Shillong, Naitung 12
U SDO ka tnad Water Resources, u Bah Laripor Roy Nongbri u la ïathuh ba na ka liang ka tnad ka lap ba kane ka pung pyllang um, kaba la ïap ki 5 ngut ha ka sngi Thohdieng ha Lapalang, kadei kaba la dep tih lypa la slem, hynrei ki trai ki pyrshang ban pynjylliew ban pynbun ïa ka um.
Haba kren sha ki lad pathai khubor u Bah Laripor u ong, ban tih pynjylliew ïa kane ka pung kaba don 33 phut, ki donkam ban sei ïa ka um, khnang ban suk ka rukom trei bad ki la pyndonkam da ka diesel pump bad ki la tan da u tyllai, ba kane ka pump kan kot ban tan ïa ka um napoh bad dei ha kane ka por ba ki pyntreikam ïa kane ka diesel pump, ka lah ban mih ka tdem bad namar ka jingjylliew ka thliew ka duna noh ka oxygen kaba la kylla long ka lyer bih.
Haba kylli kiei ki jingbthah ne ki kyndon ba ka tnad kan buh nangne shakhmat ban ym jia shuh kum kine ki jingjia, u SDO u ong “Ka tnad kat haduh mynta kam pat buh kyndon eiei hynnrei nangne shakhmat kan sa shimkhia ban buh ryntih ïa ki kyndon bad ki jingbthah ba ha kano ka rukom ba ki briew kidei ban leh haba tih pung um”.
Kine ki 5 ngut, ba kynthup 2 ngut ki napali bad 3 ngut ki Khasi ki la ïap ha katei ka pung um jong kawei ka ïingbriew ha Lapalang, kaba ki thmu ban pynkhuid hynrei namar ba ka la jylliew palat ka pung, ki la duh ring mynsiem bad ïap shapoh.
“Ngi ïohi ruh ba ka pung kadei kaba la jylliew bad ka jaka ban rung shapoh ruh kadei tang 1 ne 2 phut bad ka long kaba la khapngiah bha haduh katta-katta. Ka lyer kaba khuid ruh kam don shuh bad ka la kylla bih noh. Ha ka por ba ki rung shapoh ka lyer ban ring mynsiem ka la duna noh bad ka la bun satang ka lyer bih bads kumta kine ki 5 ngut ki sa ïap,” la ong u Bah Laripor.
Shuh shuh u la ong ba ki briew ki lah ban ring mynsiem tang 30 second ïa kata ka lyer bih hapoh ka pung bad ki long bym tip briew bad dei namar kata ba kane ka jingjia ka la poi sha kaba sngewsih.
Namarkata, u Bah Laripor u la pyntip ba na ka liang ka tnad hi, kan sa shimkhia noh halor kane ka kam bad kin sa buh ryntih noh da ki kyndon halor ka jingtih pung pyllang um.
