Shillong, Jylliew 08:
Ki sngi ki la nang jan ba ka jingpynmih bording ilektrik na ka pung Umïam kan sangeh noh shwa namar ka jingdon ka um ha kane ka pung ka la hiar shaba palat, khamtam lada ka jinghap slap kam ïarap ei ei ban pyndap um ha kine ki sngi.
Ka tyllong khubor ka ïathuh ha u snem 2014, ka um ha pung Umïam ka la hiar shaba palat ha kaba ka jingdon ka um ka la hiar sha ka 3,161 phut.
Haduh mynta, ka 8 tarik Jylliew 2023, ka jingdon ka um ha pung Umïam ka long 3162.30 phut.
“Lada ka um ha pung Umïam ka hiar shuh shuh kham shapoh ban ïa kaba long ha u snem 2014, ka lad ban dang bteng ban pynmih bording ka la duna bha,” la ïathuh ka tyllong khubor.
Kumba ka long mynta, ka Sorkar Jylla ka hap ban pynlut kumba T.3 klur shisngi ban thied bording ilektrik na shabar kum ka jingïarap ïa ka MeECL.
Dang shen, u Myntri Rangbah, Conrad K Sangma u la ong ba ka Sorkar Jylla ka hap ban pynlut shuh sa kumba T.300 klur lada kane ka jinglong jingman ka bteng ha kane ka rukom khamtam lada ym hap slap ban pyndap um ïa ka pung Umïam bad kiwei ki jaka ba den ban pynmih bording ilektrik.
