Shillong, Naiwieng 18
Ka Voice of the People Party (VPP) ha ka sngi Balang ka la dawa ban hiar shuki noh ïa u Symbud Myntri Rangbah ka Jylla u Bah Prestone Tynsong da kaba ong ba tang ka jingpanmap kam pat biang halor ka jingkynnoh ba u la kren pynjah burom pyrshah ïa ki nonghikai.
U President ka VPP u Bah Ardent Miller Basaia-wmoit u la ong ba ka seng ka pynrem jur ïa katei ka jingkren bad sngewlehraiñ kum ki nongmihkhmat paidbah ban kynnoh ba ki nonghikai ha Meghalaya ki dei ki kruiñ bad ki sohpyut.
Halor ka jingkylli halor ka jingïakhih kaba dang ïaid shakhmat jong ka seng nonghikai skul Khasi Jaiñtia Deficit School Teachers’ Association, u Bah Ardent u la ong ba ka Sorkar ka pyrshang ban kynnoh ïa kiwei halor ki jingthut jong ka hi.
“Ki lah ban kynnoh ïa ngi ruh phi leit ïakynduh ïa ka Sorkar bad kylli mano ba pynkhih ïa kine ki nongïakhih, bad ki lah ban kynnoh ïa ngi”, u la ong.
“Phi ïohi, ha ka ri synshar paidbah, baroh ki don ka hok ban ïakhih, ban pynpaw ïa ka jingsngewkhia jong ki, baroh ki don hok ban pynpaw ïa la ka jong ka jingsngew. Ka long kaba sngewsih ban ïohi ba ka Sorkar ka pyrshang ban wad ïa ka lad ban buh ïa ka jingkynnoh ha kiwei na ka bynta ka jingbakla jong ki hi”, u la bynrap. U Bah Ardent u la ong ba ka jingkren jong u Bah Prestone pyrshah ïa ki nonghikai kam long kaba lah ban pdiang.
“Ngi pynrem jur ïa ka Sorkar bad sngewlehraiñ kum ki nongmihkhmat paidbah namar ha man la ki jaka, ki nonghikai ki shah kheiñ kum ki nongtei ïa ka jaidbynriew”, u la bynrap.
“Dei tang ha ka Jylla Meghalaya, hapoh kane ka Sorkar, ba ki nonghikai ki shah thombor kum ki kruiñ bad ki sohpyut”, u la ong. Halor ka jingkylli la u Bah Prestone u dei ban panmap ne em, u Bah Ardent u la ong ba ka jingpanmap kan nym biang.
“U Bah Prestone um don hok ban bteng ïa ka shuki u dei ban hiar shuki noh”, u la ong.