Shillong, Naiwieng 18
Ka Khasi Hills Bazar Bus Association (KHBBA) ha ka step jong ka sngi Balang ki la pynlong da ka jingïaid rally na jaka ïeng bos Mawlong Hat ter-ter sha Them Bijoy, Pump Anjalee barim bad pynkut biang ha jaka ba ki sdang.
Haba kren sha ki nongthoh khubor u Bah Kyrshan Rynjah uba dei u General Secretary KHBBA u la ong ha ka jingshisha ki la pan jingbit ban pynlong ka jingïaid ‘rally’ na Mawlong Hat sha Secretariat, hynrei ha ka jingai jingbit pat la ailad ïa ki ban ïaid lyngba ka Motphran sha Them Bijoy, sha Pump Anjalee barim ter-ter sha ka jaka ba ki dang bteng ban pynlong ïa ka jingïakhih.
“Ka jingbym ai jingbit ban ïaid sha Secretariat ka lah ban dei ba ki la ïohi kumno kiwei ki rally ki long ha ka por ba ki shah ban ïaid sha Secretariat, ne ki tharai ïoh jia ka jingjia ba sngewsih bad ka lah ban dei namar kata ka daw” u la ong.
Ha katei ka jingïaid ‘rally’, ki nongñiah bos ki la pynpaw ka jingpyrshah ïa ka jingthmu jong ka Sorkar ban pynkynriah ïa ki, ha kaba ki la rah ïa ki plakad bad pyrta ba kin ym mih da lei-lei na ka jaka ïeng kali kaba ki don mynta.
Haba ïadei ba ka kynhun ki nongñiah bos ki la ïoh ban shong jingïalang bad u Director ka tnad Pynroi Sor, na ka liang u Bah Kyrshan u la ong ba kam don eiei ka khubor ba seisoh ïa ki mat jingdawa jong ki, hynrei ka jingkhot jong ka Sorkar ban ïakren ka dei beit tang kumno ban khroh bad ban pynbor ïa ki nongñiah bos ba ki dei ban mih noh shuwa jong ka 25 tarik u Naiwieng 2026 na ka jaka ïeng kali kaba don ha Mawlong Hat.
Haba kylli haba ïadei ki sienjam ba ka kynhun kan shim nangne shakhmat, u la ong, “Lada ka Sorkar kam sngap bad kam pdiang ïa ka jingtyrwa jong ngi, ngin sa shong jingïalang haba ïadei ki sienjam kiba ngin sa shim nangne shakhmat bad hangta ngin sa shim ïa ka rai”.
U la bynrap ba “Lada ngi kynriah na kane ka jaka ka jingshah ktah kaba nyngkong eh ka dei ïa ki nongrep, ïa ki nongkhaïi barit baria kiba wan na kylleng jong ka Ri Khasi, namar shisien ba la jngai na Ïewduh ka bai kit ka la rem bad ka dor ki mar ki mata ha ki shnong ki thaw ruh kan kiew” u la ong.
Kumba ka long mynta ka kynhun ki nongñiah bos hadien ba la kut ka jingïaid ‘rally’, ki dang bteng ban pynlong ïa ka jingïakhih kaba jai-jai bad sah miet ha katei ka jaka ïeng bos.