Teh lama ïong ka MCTA ha kylleng ki kolej ka Jylla bad pynrem jur ïa ka jingkynnoh u Bah Prestone

Shillong, Naiwieng 18 Ki nonghikai kolej kiba don hapoh ka shatri jong ka Meghalaya College Teachers’ Association (MCTA) ki la pynlong da ka jingïakhih wah lama ïong ha ki kolej bapher-bapher ban ai jingkyrshan ïa...

Shillong, Naiwieng 18

Ki nonghikai kolej kiba don hapoh ka shatri jong ka Meghalaya College Teachers’ Association (MCTA) ki la pynlong da ka jingïakhih wah lama ïong ha ki kolej bapher-bapher ban ai jingkyrshan ïa ka Khasi Jaiñtia Deficit School Teachers’ Association (KJDSTA) kaba dang don mynta hapdeng ka jingïakhih ban dawa ïa ka hok ka jong ki nonghikai.

Ka MCTA ka la pynrem jur ruh haba ïadei ka jingkren jong u Symbud Myntri Rangbah ka Jylla uba la kynnoh ‘Kruiñ’ bad ‘Sohpyut’ ïa ki nong-hikai Deficit kiba dang pynlong ïa ka jingïakhih.

Ka MCTA ka la ong ba kane ka jingïakhih jong ki ka la long kaba jop, ha kaba ki nonghikai ki la pynher bad deng ïa ki lama ïong bad pynpaw ba ka jingïakhih jong ki ka long kaba jai-jai ha kylleng ki kolej jong ka Jylla.

Ki kolej kiba ïashim bynta ha kane ka jingteh lama ïong ki kynthup ïa ka Union Christian College, College of Teacher Education (PGT), St. Mary’s College, Mendipathar College, Lady Keane College, Shillong Commerce College, Sankardev College, Shillong College, St. Anthony’s College, Synod College bad Ri Bhoi College.

“Ka jingïakhih teh lama ïong (black flag) kam dei tang ba ngi pynpaw ka jingpynrem, hynrei ka jingpynpaw ban burom ïa ka hok bad ban pynneh ïa ka bha ka miat ka burom jong ki nonghikai” la ong ka MCTA.

Ka MCTA ka ong ba ki jingdawa kiba la pynpaw da ki nonghikai skul kim dei ki jingdawa kiba khlem nongrim lane ki jingïaleh pyrshah ïa ka Sorkar Jylla, hynrei ki dei ki mat kiba la slem bha kiba ïadei bad ka jingpyntreikam ïa ki polisi, ki kyndon shakri bad ki hok kiba dei hok ban ïoh, kynthup ïa ka CPF bad NPS, ka jingpyntreikam ïa ka CPF Scheme 2023 bad ka jingweng noh ïa ka Scheme 2026, ka MACPS, ka Structured Pay Framework bad Composite Grant, ka jingbym pynbna ïa ki jinglait kam nonghikai Deficit, ka tulop ba dang sahteng bad ka jingslem ban pyllait ïa ka Dearness Allowance (DA).

“Ka Association ka ïeng skhem ha ka nongrim ba ki nonghikai kiba dawa ban ïoh ïa ki hok kiba dei hok ban ïoh, ki dei ban ïoh ïa ka jingïakren kaba don nongrim bad ka jingïasyllok kaba don jingmut, ym ban ïoh ïa ki kyntien kiba pynjah burom” ong ka MCTA.

Ka Association ka la ong ruh “Ka bha ka miat jong ki nonghikai bad ka bha ka miat jong ki khynnah pule ka dei kaba ïasnoh lang. Kano-kano ka jingbteng ban shim noh ïa ki hok bad ka burom jong ki nonghikai kan ym ktah tang ïa ka kam nonghikai, hynrei kan ktah ruh ïa ka jingai jinghikai kaba bha, ka jinglah ban ïoh ïa ka jinghikai bad ka lawei jong ka pule puthi ha ka Jylla”.

Haba pynskhem biang ïa ka jingkular ban ïeng na ka bynta ka pule puthi ki khynnah pule, ka Association ka la ong ba ka kyrshan ïa ka rukom ai jinghikai kaba la bei tyngka da u paidbah, kaba baroh ki lah ban ïoh bad kaba shong nongrim ha ka jingngeit ba ka pule puthi ka dei ban shakri ïa ki jingangnud bad jingthrang jong ka imlang sahlang baroh kawei.