Shillong, Naiwieng 18
U President ka VPP u Bah Ardent Miller Basaiawmoit ha ka sngi Balang u la kynthoh ba ka Sorkar MDA ka kynnoh ïa ka VPP na ka bynta man la ka jingïa-khih namar ka jingtieng ïa ka jingkyrshan paidbah kaba nangroi jong ka, haba u la leit ban jngoh ïa ki longkmie kiba ïalam ïa ka jing-ïakhih khlem buh por ban pyrshah ïa ka Shillong Ropeway Project ha Barik.
Ïa kane ka jingïakhih la pynlong hapoh ka lama jong ka Joint Action Committee Against Shil-long Ropeway Project.
Haba kren sha ki nongthoh khubor, u Bah Ardent u la ong ba ka jingpyrshang jong ka Sorkar ban ai rong saiñ pyrthei ïa ka jingïakhih kam dei kaei-kaei kaba thymmai.
“Phi ïohi, kane kam dei ka sien kaba nyngkong ba ka Sorkar ka pyrshang ban kynnoh ïa ka VPP. Ha kano-kano ka mat, la ka long ka mat ba la pynpaw da ka GTF, ngi tip da ka jingshisha ba kin kynnoh ïa ngi na ka bynta man la ka jingïakhih. Balei? Namar ki kwah ban pynjah burom ïa ka VPP, bad kane ka mih na ka jingtieng na ki nongïalam ka MDA ïa ka VPP” u la ong.
“Ka pyni tang ba ka VPP ka nang khlaiñ nang khlaiñ man ka sngi. Lada ngim khlaiñ, lada ngim ïoh ïa ka jingkyrshan na ki paidbah, hato phi tharai ba kin pynshitom ïa ngi? Hato phi tharai ba kin pynmih wat ïa ka kyrteng jong ngi? Kumta ka long kaba pyni ïa ka jingshisha ba ka VPP ka nang ïoh ïa ka jingkyrshan na ki paidbah man la ka sngi,” u la ong.
U Bah Ardent u la ong ba ka VPP ka la wan sha Barik ym ban ïalam ïa ka jingïakhih, hynrei ban ïeng ha syndah ki longkmie kiba la sdang ïa ka.
“Ngim don hangne ban shim noh ïa ka burom jong ki. Ngim don hangne ban hiar thma ïa ka mat. Ngi don hangne tang ban ai jingkyrshan ïa ka kynhun jong ki kynthei kiba pyrshah ïa kane ka projek,” u la bynrap.
U la ong ba ka jingwan jong ka seng ka long ruh ban pynpoi ïa ka khubor kaba skhem sha ka Sorkar ban burom ïa ki jingpyrshah jong ki nongshong shnong bad ban pynkynriah ïa ka projek.
“Ka jingthmu jong ngi ban leit jngoh ïa kane ka kynhun jong ki longkmie, kaba la pynpaw ïa ka jingsngewkhia jong ka halor kane ka projek ropeway ha Lum Shyllong, ka long ban pynpaw ïa ka jingïatylli jong ngi, ban ai ka jingkyrshan kaba don akor, bad ban pynsngew ïa ka khubor sha ka Sorkar ba phi hap ban sngap ïa ka jingdawa jong kane ka kynhun” u la ong.
U Bah Ardent u la kam ba ka Sorkar ka lah ban paw ba kam sngap jar na ka bynta mynta, hynrei u la ong ba ka jingkyrshan jong ka VPP ka lah ban pynkylla ïa ka jingïaid lynti jong ka jingïakhih.
“Kumba ka long mynta, phi lah ban ong ba ka Sorkar kan nym sngap ïa ka jingdawa jong ka kynhun ki longkmie, hynrei tang ka por kan sa pynpaw la ka Sorkar kan pynkynriah ne em. Hynrei ngi shimkhia ha ka jingshisha ba ngin ym iehnoh marwei ïa kine ki longkmie,” u la ong.