Shillong Jylliew 09:
Ka Jylla ka phaikhmat mynta sha kiwei pat ki lad ban pynmih bording ilektrik hadien ba ka jingpynmih bording na ka um da kaba den ïa ki wah kam ai jingshngaiñ, bad ka Sorkar kan thaw ki lad kumno ban shna ïa ki projek ban pynmih bording na u dewïong bad na ka sngi.
U Myntri ka tnat bording u AT Mondal u la ong ba ka jinglong jingman kam shngaiñ namar ka um ha ki wah ka duna ha ka por ba rang, bad ka Sorkar ka hap ban thawlad kumno ban pynmih bording na u dewïong bad na ka sngi.
U la ong ba ka Sorkar ka kwah ban ïoh bording ruh lyngba ka tyndong lyer (gas) bad na u dewïong ruh kumjuh.
Kham mynshwa ka Sorkar ka la aiti ha ka NEEPCO ban sdang ïa ka projek bording na u dewïong (thermal plant) ha Nangalbibra ha Rilum Garo hynrei ka NEEPCO ka ïakynduh jingeh khamtam hadien ba khang ka NGT ban tih dewïong.
U Mondal u la ïathuh ba ka NEEPCO ka la phah jingthoh ban iehnoh ïa kane ka projek, hynrei ka Sorkar Jylla kan thoh biang sha ka NEEPCO ban pyrkhat biang ïa kane ka projek ban pynïaid shakhmat.
Shuh shuh u Mondal u la ong ba da ka jingthmu ban pyntreikam ïa ka Chief Minister Solar Mission, kan ïarap shuh shuh ïa ki paidbah ban ïoh bording na ka sngi ha kaba ka Sorkar ruh kan ai ka jingïarap.
