New Delhi, Naitung 06
U Myntri Rangbahduh ka ri, u Narendra Modi ha ka Sngi U Blei u la ïakynduh ïa u President ka Argen-tina, u H.E. Javier Milei. Ïa u Modi la pdiang sngewbha da u Milei haba u la poi ha Casa Rosada.
Mar ïa poi ha Buenos Aires hynnin ka sngi, la pdiang burom ïa u Myntri Rangbahduh. Kane ka jingwan jngoh ka long kaba kongsan namar ba ka dei ka jingwan jngoh kaba nyngkong eh jong u Myntri Rangbahduh ka India sha Argentina hadien 57 snem.
Ha kajuh ka por, kane ka dei ka snem kaba kongsan na bynta ka jingïadei hapdeng ka India bad Argentina naba kine ki ar ri ki rakhe ïa ka jingdap 75 snem jong ka jingïadei hapdeng jong ki.
Na ka liang u Myntri Rangbahduh, u la ai khublei ïa u President Milei na bynta ka jingpdiang sngewbha ïa u lem bad ka kynhun jong u.
Kine ki nongïalam ha ka jingïakynduh jong ki, ki la pynlong ïa ki jingïakren kiba bniah bad khmih bniah ïa ka jinglong-jingman baroh kawei jong ka jingïadei hapdeng jong ki. Ki la ban jur ban pynkhlaiñ ïa ka jingïatreilang ha ki liang ki marpoh khyndew ba kongsan, ka umphniang bad ka ‘gas’, ki kam ïada ri, ka bor niwkliar, ka rep ka riang, saian bad teknoliji, ka jingpyndonkam ïa ki ‘drone’ ha ka rep ka riang, ka kam ri dohkha bad ka jingpeitngor ïa ki laiñ pynpoi bording, ka ICT, ‘Digital Public Infrastructure’, UPI, haw-haw, lynti rel, ki dawai-dashin, ki kam ïalehkai bad ka jingïadei hapdeng ki nongshong shnong kine ki ar ri.
Kumjuh, kine ki nongïalam ki la shimkhia haba phai sha ka jingïatreilang kaba dang ïaid shakhmat ha ka liang ka ïoh ka kot. Haba ïadei bad kane ka bynta, ki la ïakren ruh halor kumno ban pynïar ïa ka ‘India-MERCOSUR Preferential Trade Agreement’.
U Myntri Rangbahduh u la ai khublei ruh ïa u President Milei halor ka jingpynrem jur ïa ka jingshah thombor ba shyrkhei ha Pahalgam bad ïaroh ïa ka jingïeng tylli jong ka Argentina na bynta ka India ha ka jingïakhun pyrshah ïa ki kam lehnoh.
Kine ar ngut ki la mynjur ba ki kam lehnoh ki buh ka jingma kaba khraw ïa ka longbriew-manbriew bad pynskhem biang ïa ka jingkular ban pynkhlaiñ ïa ka jingïakhun ha ka pyrthei pyrshah ïa kane ka jingma.
Shuh shuh ki la mynjur ban bteng ha ka ban ïatreilang ban pynkhlaiñ ïa ka jingïadei hapdeng jong ki.
Ha shuwa ban pynkut ïa ka jingwan jngoh jong u, u Modi u la leit ban leh burom da ki syntiew ïa ki motdur jong u Mahatma Gandhi bad u Rabindranath Tagore ha Buenos Aires.
U President Milei u la ai khublei ruh ïa u Myntri Rangbahduh halor ka jingwan jngoh ba kongsan jong u sha Argentina. Na ka liang u Myntri Rangbahduh u la khot sngewbha ïa u President Milei ban wan sha India ha ka por kaba ïabiang lang ïa baroh.
