Shillong, Naitung 06
U MLA ka North Shillong Konstitwensi, Bah Adelbert Nongrum, u la pynpaw ïa ka jing-sngew bynñiaw halor ka jinglong-jingman jong ka jaidbynriew, kaba la nang hiar bad ring sdot namar ka jingbym don ïa ki nongïalam kiba ïohi jngai.
U Bah Adelbert u la kren bad pynpaw ïa kane haba ai jingkren kum u kongsan ha ka sngi ba ka Riatsamthiah Women Social Welfare Associa-tion ka la pynlong ïa ka prokram pynkup burom ïa ki samla kiba la pass bha ha ka eksamin Secondary School Lea-ving Certificate (SSLC).
Ha kane ka jingïalang, u Bah Adelbert u la kren halor ka jinghiar ka jaidbynriew katba nang mih ki sngi bad ki por bad kane baroh ka wan namar ka jingpang kaba la don ha ka jingmut jingpyrkhat, ha ka mynsiem, ha ka met, kaba la pynring sdot ring swai ïa ka jaidbynriew.
Haba kren halor kane ka mat, u Bah Adelbert u la ong ba ka long kaei-kaei kaba sngewsih ba katba nang mih ki sngi bad ki por ka jaidbynriew ka la nang hiar ar shah namar ka jingbym don ïa ki nongïalam kiba ïohi jngai kiba don ïa ka mynsiem len lade, hynrei ki don tang ki nongmihkhmat.
Nalor kata, u la ong ruh ba ha ka jaidbynriew ki bun ki shynrang katba ki rangbah pat ki duna bad kumta, ka la nang synjor. U la ong ba ka jylla kaba la ïaid mynta 53 tylli ki snem, ka rta ka la ih hynrei ka la tlor bad ring sdot namar bym pat don pat ïa ki nongïalam ba ïohi jngai bad len lade ban aiti ïa ka lawei ba phyrnai, kumta haba ki longïing-longsem ki synjor, ka jylla ruh ka synjor.
