Shillong, Naitung 06
Ka surok kaba don mar syndah bad ka jingkieng shwa ban poi ka thanat Umïam, ka la pynsohsat shi kat dei eh ïa ki nongleit-nongwan namar ka jingsniew bad jot rathai ha kane ka bynta jong ka surok.
Ka jingjot bad jingdap da ki thliew ha kane ka bynta jong ka surok mar ïa lait ïa ka jingkieng kam dei kaba dang shu sniew dang shen hynrei ka dei kaba la neh mynta da ki bun bun bnai, haduh ba ka la pynthut bad pynwit shi kat dei eh ïa ka leit ka wan.
Ym tang ba ka la pynsohsat ïa ki nongleit-nongwan, hynrei ka la long ruh kum ka jingpynjah burom ïa kata ka jingpaw ka Meghalaya ha ka liang ki kam jngohkai namar kane ka bynta jong ka surok kaba sniew, ka dei kaba jan baroh ki nongwan jngohkai ki hap ban ïaid lyngba.
Haba hiar ne kiew lyngba kane ka surok na Shillong sha Ri-Bhoi bad ynda poi ha kane ka bynta jong ka surok, la ju lap beit ym tang ïa ka jingpynsuki jong ki nongñiah ïa ki kali hynrei ban ïaleh ruh ka kiar na ki thliew, kaba ym lah pat satia ban kiar namar la dap lut da ki thliew haduh ba la long thik kumba shong kali kulai, ha kaba shah kynting bad shah padai shane-shatai haba don hapoh ki kali.
Ym tang ba ka la pynsohsat hynrei ka buh ruh ha ka jingma ïa ki nongleit-nongwan bad khamtam lei ha ka por ba jur u slap, ym ithuh shuh kano ka bynta kaba thliew kano kaba biang.
Kaba lyngngoh pat hangne ka long ba watla naduh ki heh haduh ki babu Sorkar ki ïaid ïa kane ka surok jan manla ka sngi, hynrei imat ki leh matlah bad leh bym patiaw ne ïoh dei ba ki kali kaba ki shong, kim ïoh sngew satia ïa kine ki thliew.
Kiba bun ki nongleit-nongwan kiba ju pyndonkam ïa kane ka surok, ki la pynpaw ïa ka jingsngew bynñiaw halor ka jingbym shimkhia jong ka tnat ba dei khmih ïa kane ka bynta jong ka surok ban maramot noh wut-wut, watla kane ka jingsniew bad dap thliew jong kane ka surok, ka la long da ki bun bun bnai.
Shuh shuh ki la pynpaw ba na ka liang ki nongïalam ïa ka Sorkar na kawei ka por sha kawei pat ki ju kren bad pynpaw ba kum ka Sorkar ka la shimkhia ha ka liang jong ki surok bad la pynïoh surok sha kiba bun ki shnong hynrei ka jingkylli hangne ka mih, balei pat tang ïa ine i jingsniew bad dap thliew jong ine i bynta jong ka surok pat kam lah ban phah maramot?
