Jowai, Naitung 06
Ka National People’s Youth Front, Meghalaya State Unit ryngkat ka National People’s Youth Front Jowai Block ka la pynkup burom ïa ki 137 ngut kiba wan shakhmat ha ka eksamin Secondary School Leaving Certi-ficate (SSLC) bad Hig-her Secondary School Leaving Certificate (HS-SLC) ka MBOSE 2025.
Ïa ki khusnam sha ki samla ba kynthup 74 ngut ha ka SSLC bad 63 ha ka HSSLC, la sam da u MLA ka Jowai bad State President ka NPYF Ma Wailadmiki Shylla ha ka jingïalang kaba la pynlong ha District Library Auditorium, Jowai ha ka 5 tarik Naitung.
U Ma Wailadmiki Shylla ha ka jingkren u la ong kane ka dei ka sien nyngkong ïa ka NPYF Jowai Block ba kan pynlong ïa ka jingpynkup burom ka jingithuh ïa ki samla kiba don shisha ïa ka jingthrang ban kiew shakhmat bad ban long ka nuksa ïa kiwei ki khun samla jong ka district bad ka jylla.
U la ai khublei kyrpang ruh ïa ki nonghikai jong ka Government Girls Higher Secondary School, Jowai namar ha ka sien sdang nyngkong ïa ka Commerce Stream ki la lah ban pynmih ïa kawei ka khynnah ha ka thup Top-10 ha ka HSSLC.
Nalor u MLA, la ïoh ruh ki jingkren na u Ma Omesa Shylla bad u Ma Samehi Laloo President NPYF, Jowai Block kumjuh na ki samla ba shah pynkup burom ba kynthup ïa ka Sophia Niang kaba la wan ha ka kyrdan hynriew ha ka HSSLC (Commerce) da kaba ïoh 92.20% bad ka Geliloth Nazarene S Kyndiah kaba ïoh 91.83% ha ka SSLC.
Shwa kane la ïoh ruh ka jingnguh Blei na u Ma Yoobiang Bamon, Assistant Secretary NPYF Jowai Block ki kyntien pdiang burom na u Ma William E Pasweth General Secretary NPYF, West Jaiñtia Hills District.
Ïa ka jingïalang la pynwai da ki kyntien khublei na u Ma Tremiki Sutnga Secretary NPYF, Jowai Unit.
