Shillong, Naitung 06
Ka Kong Grace Mary Kharpuri kaba dei ka MDC na Nongshken Konstitwensi, ka la ïoh ïa ka jingmynjur lang na baroh ki dkhot ban shimti noh ïa ka kam kum ka President bathymmai jong ka National People’s Party Women Front (NPWF).
Ïa kane ka rai ne ka jingmynjur la shim ha ka jingïalang jong ka National People’s Party, Meghalaya State Unit bad ruh jong ka NPWF kaba la long ha ka Sngi Saitjaiñ ka 5 tarik u Naitung 2025, ba la pynlong hapoh ka shlem treikam jong ka State Office, Shillong.
Ha katei ka jingïalang, baroh ki dkhot kiba la ïadonlang da kawei ka sur ki la ïa rai bad mynjur beit ïa ka kyrteng jong ka Kong Grace Mary Kharpuri kum ka President bathymmai jong ka National People’s Party Women Front (NPWF).
Ha katei ka jingïalang la ïadonlang ruh u Working President jong ka Meghalaya State Unit: u Bah Hamletson Dohling, u Bah Himalaya M Shangpliang kum nongaiktien (spokeperson) jong ka seng bad u Bah Ransom Sutnga nalor ki longkmie kiba dei ki dkhot jong ka NPWF.
Na ka liang u Bah Hamletson Dohling bad u Bah H.M. Shangpliang ki ai kitbok-kitrwiang ïa ka seng hapoh ka jingïalam jong ka Kong Grace Mary Kharpuri ba kan lum kan lang ïa baroh ki longkmie khnang ba ka seng kan nang khlaiñ shuh shuh.
