Shillong, Jylliew 11:
Uwei na ki ’riew pawkhmat ka Jylla, u Bah Rudi Warjri uba la shakri ïa ka India kum u ophisar ha ka kyrdan Indian Foreign Service (IFS), u la pynpaw ka jingdiaw bad bynñiaw halor ka jingbym don ki samla Khasi kiba pass ïa ka eksamin Civil Services kaba ju pynlong man la u snem da ka Union Public Service Commission (UPSC).
U Bah Rudi u dei u ophisar IFS na ka kynhun jong u snem 1978. U la ïakhun ïa kane eksamin hadien ba u la pyndep ïa ka B.A Economics (Honours) na St. Edmund’s College, Shillong ha u snem 1975.
Haba ïakren bad U Nongsaiñ Hima, u Bah Rudi u la ong ba katkum ka jinglong ka juk mynta, ki samla ha ka jingshisha ki la nang ïoh shuh shuh bun ki lad ban wad jingtip bad ka la kham pynsuk ruh ïa ki ha ka liang ka jingpule namar ka jingdon ki kor ki bor.
U la ong ba lada ki samla ki trei shitom bad don ka jingkut jingmut nalade ban pynurlong ïa ka jingthmu, khlem artatien kin lah beit ban poi sha ka thong.
Nangta, u la ai nuksa ïalade ha ka por ba u pynkhreh ïa ka eksamin Civil Services ha kaba u la kut jingmut bad dei ha ka sien ba-ar ba u la pass ïa kane ka eksamin bad ïoh ban long u ophisar ha ka kyrdan Indian Foreign Service (IFS) ha u snem 1978.
Haba ai nuksa ïa u samla na Shillong, u Swapnil Bhattacharya uba pass ïa ka eksamin Civil Services mynta u snem 2023 bad lehse u ïoh kajuh ka jinghikai na St Edmund’s College lem bad kiwei pat ki samla Khasi kiba pule ryngkat bad u.
“Nga sngew ban ong ba kito ki samla kiba pule ryngkat bad u Swapnil ki dei ban kylli ïalade balei ma ki kim lah haba u samla uba pule lang bad ki u poi sha kane ka thong,” la pynpaw u Bah Rudi.
Haba kren shaphang ka jingïoh bhah ha ka thung kam ha ka Sorkar, u Bah Rudi u la ong ba ka bhah na ka bynta kito kiba la kot bor bad kiba kham poi shakhmat kam dei shuh ban treikam.
U Bah Rudi u la ai nuksa ïalade ba ki khun jong u kim dei shuh ban rung ha kata ka bhah namarba ma u kum u kpa u la don bun ki lad ban kyntiew ïa ki khun la ka dei ha ka jingpule bad kiwei kiwei ki lad na ka bynta jong ki.
Kumta u la ong ba ka bhah thungkam ka dei ban treikam na ka bynta ki bym kot bor bad ki bym donlad, ym na ka bynta ki briew kiba kot bor.
U Bah Rudi u la shakri kumba 36 snem kum u ophisar IFS bad ka Sorkar India ha kaba u la bat ruh ïa ki kyrdan bapher bapher kynthup kum u nongrah ktien (Ambassador) ka India sha kiwei pat ki ri kiba u shahjied ban leit trei.
Ki ri kiba u Bah Rudi u la trei kum u ophisar IFS ki kynthup ïa ka High Commission Kenya, Hungary, Indian Peace Keeping Force ha Sri Lanka. U la don ruh bad ka United Nations ha kaba u la shah bynshet ban don ha Cambodia. U Bah Rudi u la leit ruh sha New York bad donbynta ruh ha ka Economic Reforms ha Harvard University, ha University of Pensilvania bad ha kylleng kylleng ki Chamber of Commerce. Ha ka por ba jia ka jingbthei ka World Trade Centre, u Bah Rudi u don ha New York.
U Bah Rudi u la long ruh u Ambassador ka India sha Peru, ha Brunei kum u High Commissioner, bad u la long u Ambassador ha Columbia bad leit ruh sha Costa Rica, Equador.
Une u rangbah uba ka jaitbynriew Khasi ka dei ban sngew sarong, u la don bha ka jingshemphang bad lada ka Sorkar Jylla ka pyndonkam ïa u lehse kan long ka jingmyntoi shi kat dei eh khamtam ha ka rukom treikam ban kyntiew ïa ka Jylla.
