Shillong, Jylliew 12:
U Myntri ka tnat Social Welfare ka jylla, Bah Paul Lyngdoh ha ka 12 tarik mynta u bnai u la pyntip ba ka Sorkar ka la mynjur ïa ka draft policy jong ka ‘DREAM’ projek, kaba dei ka kyntien lyngkot jong ka Drug Reduction Elimination and Action Mission, ka mission ban trei na ka bynta ban rat dyngkhong ïa u drok na Meghalaya.
“Ka bynta ba kongsan ban phai khmat mynta kan dei halor ka projek ‘DREAM’ ïa kaba la pynbna ha u snem ba la lah, ha kaba la buh lypa ka jingmang pisa kaba kot haduh T.5 klur na ka bynta ban pynïaid shakhmat ïa ki kam pynbna paidbah bad ban pynjur ka jingleit ai jingpynshai bad kine baroh kin dei beit hapoh jong kane ka mission,” la pyntip u Myntri haba kren sha ki lad pathai khubor ha ka sngi Nyngkong.
Ha kane kajuh ka sngi une u Myntri ka tnat Social Welfare u la lum ïa ka jingïalang bad ki ophisar na ka tnat pulit, social welfare bad tnat ka koit ka khiah bad ruh na Meghalaya Institute of Mental Health and Neurological Science (MIMHANS) bad kiwei kiwei.
U Bah Paul u la ong, ba ki jingkynrei jong kito kiba la kyrni bad ngop ha u drok hapoh ka jylla ka la kiew sted bha, kaba la pynlong pat ïa ka Sorkar ban pynthymmai noh ïa ka rukom pyrkhat ka jong ka kumno ban ïakhun pyrshah ban lah ban rat dyngkhong ïa kane ka jingeh bad jingkynrei jong u drok kaba la ktah ïa ka imlang ka sahlang.
Shuh shuh u Myntri u la pyntip ba hapoh kane ka mission, u Mission Director bad ka kynhun jong u, kin ïarap ïa ka sorkar ha ka ban pyntip ïa ki lad ki lynti ba la shim da ki tnat bapher bapher kiba don jingïadei bad kane ka mat.
“Nga ai ka jingkular ba na ka liang jong ka sorkar kan shim lut ki lad ki lynti ban rat dyngkhong ïa kane ka jingeh kham kloi katba lah namar ka la buh ha ka jingeh ïa ka imlang ka sahlang bad khamtam lei ha ka jingshong shngaiñ bad jingïada jong ki nongshong shnong.
