Shillong, Jylliew 14:
Ka shnong Nongjrong ha Mawkynrew konstitwensi kaba la sdang paw bad bna nam kum ka jaka jngohkai kaba itynnad bad kaba lah ban khring ïa ki nongwan jngohkai na kylleng ka Jylla bad India, kan sa nang lah shuh shuh ban pynbiang ïa ki jingdonkam ki nongjngohkai ha kaba ka tnat jngohkai ka Sorkar Jylla ka la pynkhreh ban tei ïa ka Resort ha ka jingmang pisa kaba long kumba T.5 klur.
Ki bor pynïaid shnong, ha kaba sdang, ki la shu shna hi ïa ki maw jingkieng, ki jingker bad ki jaka ïeng ban jngohkai ïa ka Wah Umngot kaba ker pyllun ïa ka shnong Nongjrong bad ïa kane ki la trei na ka skhim MGNREGA, bad tang na kine ki kam barit, ka la khring ïa ki phew hajar ngut ki nongwan jngohkai ha kine ki khyndiat snem.
Ka jingmih u lyoh na them Wah Umngot ha ka aïom synrai bad tlang ka la pynitynnad bad khring shuh shuh ïa ki briew na kylleng ban wan sha Nongjrong kiba la poi sha katei ka shnong naduh dang step phyrngap, nalor ka jingitynnad ka mariang kaba la don lypa ha kane ka shnong.
Kumta khnang ban nang lah ban pynïaid shakhmat ïa katei ka projek, na ka liang u MLA ka Mawkynrew, u Bah Banteidor Lyngdoh u la leit sha Nongjrong ryngkat ki ophisar ka tnat jngohkai ban ïamir jingmut lang bad ki bor shnong ha ka 14 tarik u Jylliew, 2023.
U Bah Banteidor, ha ki snem kiba la dep, u la nang pruid dak ruh kumno ban kyntiew shuh shuh ïa ki kam jngohkai ha ki jaka kiba don ha Mawkynrew konstitwensi kum ka Laitlum, Syntung lem bad ka Nongjrong.
Ha ka jingïalang, na ka liang ki bor shnong bad ki nongshong shnong, ki la pdiang hun mynsiem ïa katei ka projek kaba la don mynta ha ka bynta ban pyntyllun noh ïa ki kam ka ha ryngkat ka thong ban kyntiew ïa ka ïoh ka kot bad thaw ki lad ïoh kam ïoh jam na ka bynta ki khun samla ha katei ka shnong.
Hadien ka jingïalang, u Bah Banteidor u la leit ban jurip ïa ka jaka leit bar kaba dang shna bha kaba don hajan ka jaka jngohkai bad kumjuh ka jingtei kaba dang ïaid shakhmat na ka bynta ka Nongjrong Sub-Centre.
“Ka kam jngohkai pyrthei ka dei kawei pat ka lad ban kyntiew ïa ka ïoh ka kot ki nongshong shnong kane ka shnong kaba la paw bha bad tip lut da ka pyrthei hi baroh kawei,” la ong une u MLA ka Mawkynrew.
U la ong ba ka jingwan sha Nongjrong ka long namar ka jingthmu ban shna ïa ka Resort bad ban ai jinghikai ïa ki khun samla ban tip ïa ki jingmyntoi ki ban ïoh na ka jingkyntiew ïa ka kam jngohkai.
U la bynrap ba ka shnong Nongjrong kan dei ka nuksa kaba biang tam na ki jaka jngohkai ha ka Jylla da ka jingïatreilang bad ki bor shnong bad ki nongshong shnong ban kyntiew ïa ka kam jngohkai pyrthei.
U la ong ïa mynta ki nongshong shnong ki la buh ïa ki Homestay hynrei namar ka jingwan tuid bun ki nongjngohkai, ki dang kwah shuh ban shna kham bun tylli.
Na ka liang u Bah Pynshai Synjri uba dei u Sordar ka Nongjrong, u la ong ba ki samla na shnong ki bun ki la pyndep ki jingpule bad kim ioh kam satia bad mynta ki don ki khynnah shnong kiba la shim kam kum ki tourist guide bad bun na ki hi ki sngewthuh ba ka long ka jingkyrkhu na ka kam jngohkai.
Haba pynpaw ba ki nongshong shnong ki dang shaniah ha ka kam rep, u la ong ba u angnud ba ka kam jngohkai ha ryngkat ka kam rep lane ka Agro-Tourism kan treikam lang, bad u la ai khublei ïa u MLA uba la shimkhia ban thaw lad thaw lynti ban wanrah ïa kane ka projek.
U Bah Synjri u la ïathuh ba ki nonjngohkai kim ju pep shuh ban wan man la ka sngi sha Nongjrong bad ki samla ki la hap ban phaikhmat ban shim kabu na kane ka kam jngohkai pyrthei.
