![Leit ïakynduh u CEM, Chairman ka KHADC ïa u Bah DD Lapang KHADC](https://unongsainhima.com/wp-content/uploads/2023/06/KHADC-1-jpg.webp)
Shillong, Jylliew:
Ha ka Sngi Ba-ar ka 27 tarik Jylliew 2023, kaba dei ruh ka District Council Day lane ka lyngkhuh snem kaba 71 snem hadien ka prokram na KHADC, u CEM Bah Pynïaid Sing Syiem ha ka jingsynranlang u Chairman ka Council u Bah Lamphrang Blah bad u Bah Charles Marngar, Dy Chairman, ki la leit ban ïakynduh kyrpang ïa u Myntri Rangbah barim ka Jylla u Bah DD Lapang.
Ka jingthmu jong kane ka jingleit ïakynduh ka long kum shi bynta ban kynmaw ïa ka jingshakri jong u ïa ka Jylla ha ka por ba u dang long kum u Myntri Rangbah, bad kum uwei na kiba la ïadon bynta ha kato ka por kumno ban kyntiew ruh ïa ka District Council.
Ha Kane ka jingleit ïakynduh na ka liang u CEM Bah Pynïaid Sing Syiem u la ai ki kyntien kyrkhu kyrdoh ïa Bah DD Lapang bad pyrto ïa ki kam shakri, ïa u synñiang u bynhei mynba u dang trei shitrhem bad don bynta bha ha ka saiñ hima sima.
Ha kane ka sngi, na ka liang u Bah DD Lapang ruh u la pynpaw ïa ka jingsngewnguh kaba khraw shibun eh ïa u CEM, namarba u la kynmaw ban wan jngoh ïa u ha kane ka sngi. U la ai ruh ïa kyntien kyrkhu kyrdoh ïa ka EC kaba thymmai ba la ïalam da u Bah Pynïaid Sing Syiem, kumjuh ïa ki EM bathymmai ïa ka Legislative wing, ïa u Chairman bad u Dy.Chairman, bad ïa baroh ki MDC hapoh ka KHADC.