Nongstoiñ, Nailar 06:
Ki pulit SRT ha ryngkat ki pulit ka tnad Fire & Emergency Service, Nongstoiñ bad ki paidbah kiba ïadon lang ha ka Sngi U Blei ki la lap ban sei ïa ka met u Bah Elius Thabah (38 snem ka rta) uba la jah rngai na ka jaka leit khwai ha ka 5 tarik mynta u bnai ha ka Wah Riwiang, West Khasi Hills.
Katkum ka tyllong khubor na ki heh pulit ka distrik, la ïathuh ba ïa ka met jong utei u rangbah la ïoh ban sei bad khwai na katei hi ka jaka kaba u shong ban khwai ha Wah Riwiang hadien ba ki pulit SRT ha ryngkat ki pulit ka tnad Fire & Emergency Service, Nongstoiñ lem bad ki paidbah ki la pyrshang ban ïai wad.
Kum ban shu pynkynmaw, na ka liang ki pulit ka Nongstoiñ Police Station ki la ïoh pdiang ïa ka jingujor ha ka Sngi Saitjaiñ na uwei u Rangbah halor ka jingjah rngai u hynmen jong u ba la tip kyrteng kum u Bah Elius Thabah (38 snem ka rta).
Shuh shuh ka jingujor ka ong ba u Bah Elius Thabah u la jah noh katba u dang leit khwai ha ryngkat u paralok jong u ha Wah Riwiang kaba don ha WKHD ha ka surokbah na Nongstoiñ sha Riangdo.
Ka khubor ka ong ruh ba hadien ba la ïoh pdiang ïa ka jingujor, ki pulit ha ryngkat ka kynhun Fire & Emergency Service na WKH ki la pynlong ïa ka jingleit wad ïa utei u rangbah na katei ka jaka ba u jah bad la lap ïa ka met jong u ha ka Sngi U Blei.
