Shillong, Naiwieng 09
U Bah Donbok Dkhar, President ka Hynñiewtrep Integrated Territorial Organization (HITO) u la kynthoh ïa ka Sorkar ba lamkhmat da ka National People’s Party (NPP) ban ong “Ka NPP ka wanrah projek ban myntoi ka party, ym ban aikam aijam ïa ki samla”.
Ïa kane u Bah Donbok u la kren ha ka sngi Nyngkong, ha ka jingwan ban ai ka jingkyrshan ïa ki longkmie ka Joint Action Committee (JAC), kiba la shong ïakhih ha u motdur u Kiang Nangbah, hajan Civil Hospital Shillong, ban dawa weng noh mardor ïa ka projek Ropeway ha Lum Shyllong.
Haba kren sha ki lad pathai khubor, u Bah Donbok Dkhar u la ong ba na ka liang ka seng, ka la dep ban phah da ka dorkhas ha u Conrad K. Sangma, Myntri Rangbah ka Jylla haba ïadei bad kane ka mat.
U la ong ruh ba ka long kaba sngewsih ban ïohi ba ka jaidbynriew kaba shim jait na ka kmie, hap ban mih hi ki longkmie ban ïada ïa ka khyndew ka shyiap.
“Hadien ba ngi ïohi ba ki longkmie ki la mih ha madan ban ïakhih, ki la ai ka jingthoh sha ka Sorkar, ki la ïakynduh ïa ki heh Sorkar, hynrei kam shym la don kata ban pynkohnguh ïa ka jingdawa ki longkmie bad ki nongshong shnong,” la ong u Bah Donbok.
“Ki Kmie kidei kiba kha ba pun ïa ngi, kiba la ri la sumar ban pynheh pynsan, ngi don ka jingkitkhlieh. Mynta ngi ïohi ba dei ki Kmie kiba mih ban ïakhih ban ïada ïa ka khyndew ka shyiap, ka la pynkthang mynsiem bha ïa ngi ki khun samla,” u la bynrap.
U la ong ruh ba ka Sorkar kaba lam khmat da ka NPP, kadei beit ka party kaba peit kano ka kompeni ne ka projek kiba lah ban bei tyngka sha ka party, da kaba ai nuksa kumba jia ha ka Shree Cement bad kane ka projek Ropeway ruh ka lah ban dei kumjuh.
“Ha ka Bri u Hynñiewtrep jong ngi, haba leh ïa kano kano ka kam, ka dei beit lyngba ka sur u paidbah hynrei ki nongïalam shnong na Laban ki la leh ïa kane ka kam halor ka projek Ropeway, kadei ka bym shai bha, kumta haba ka don ka jingbym shai, la dei ban khot biang da ka jingpynsngewthuh paidbah. Hooid ka jingleh ka Riat Laban ki sngew ba ka dei eh namar ba la pynkhamti ha ki, hynrei ki klet pat ba ka dei lyngba ka bor jong u paidbah uba pynkiew ïa ki, la ong u Bah Donbok Dkhar.
