Nongpoh, Naiwieng 09
Ki heprit kiba dei ki dkhot jong ka Children’s Club na ka shnong Thad bad Kyrdem Kulai 6 Kilo ha Ri Bhoi District ha ka sngi Nyngkong ki la leit ban ïakynduh ïa u Dr. Abhishek Saini, Deputy Commissioner ka Ri Bhoi ban pynsngew halor ki jingeh kaba ki mad hapoh ki shnong ki jong ki.
Lehse kane kan dei ka sien kaba nyngkong eh ba ki heprit ki la mih shakhmat ban shimti ïa ka jinglong rangbah na ka bynta ban pynbha ïa ka imlang ka sahlang bad leit ban kynduh ïa u DC ka Ri Bhoi bad ban aiti ruh ïa ka dorkhas halor ki jingeh ki jong ki.
Ïa kitei ki heprit, la synran bad ïalam da ka Ri Bhoi Area Welfare Association (RAWA) hapoh ka jingïalam ka Kong Balakyntiew Umbah, President ryngkat kiwei-kiwei ki riew rangbah na kitei ki ar tylli ki shnong.
Haba kren sha ki lad pathai khubor hadien ka jingïakynduh ïa u DC, ka heprit Lashemhun K Rangtong, Treasurer ka Children’s’ Club na ka shnong Thad bad ka heprit Lapynhun Iakai Secretary ka Children’s Club na Kyrdem Kulai 6 Kilo ki la ïathuh ba ka daw kaba la pynlong ïa ki ban mih shakhmat ban ïakynduh ïa u DC ka dei halor ka jingbym biang ka jingker ha u Transformer bording ilektrik ha ka shnong Thad kaba la buh jingma ïa ki khynnah bad ruh ïa ka jingbym shngaiñ ka jaka leit tong um kaba don hapoh ka shnong Kyrdem Kulai 6 Kilo ha ki por miet namar ka jingdum.
Kitei ki heprit ki la kyrpad ïa u DC ba un shimkhia ban shna da ki jingker kiba paka ha utei u Transformer ha ka shnong Thad khnang ba kan long ka jingshngaiñ na ka bynta ki khynnah rit bad ruh ban pynïoh da ki solar light ha ka jaka leit tong um kaba don hapoh ka shnong Thad kaba buh jingma ha ka por miet.
Na ka liang u DC ka Ri Bhoi u la pynpaw ka jingkmen ban ïohi ïa ki heprit ba ki mih shakhmat ban pyni bad kdew ïa ki jingeh hapoh ki shnong ki thaw ki jong ki bad kular ruh ban shimkhia ïa ki jingkyrpad ki jong ki.
