Shillong, Naiwieng 09
Shi hajar tylli ki ksing. Kawei ka sur tem. Kawei ka ‘World Record’ kaba la buh thong.
Ka Ri-lum Garo ka dang pynkhreh ban ïoh ïa ka nam ban sah kynmaw ha ka histori jong ka pyrthei ha kaba ka tamasa 100 ksing ‘Wangala’ kan pyrshang ban lum lang ïa 1000 tylli ki ksing tem tynrai ha kawei ka lympung ban pynmih ïa kajuh ka sur tem – kaba long ka mat pdeng jong ka jingrakhe ïa ka Jubili Ksiar jong ka.
Ka jingpyrshang kaba la angnud, bad kaba thmu ban ïoh rung ha ka ‘Guinness World Records’, kan long ka phang pdeng jong kane ka tamasa kaba 50 snem; ka ban sah kynmaw ha ka histori, kaba la buh ban pynlong naduh ka 11 haduh ka 14 tarik u Nai-wieng, 2026, ha Wangala A-dam, Chibragre, ha West Garo Hills.
“Ka bynta kaba kongsan jong kane ka jingrakhe kaba pawnam kan long ka jingpyrshang kaba don jingthmu ban pynïasoh bad lum lang ïa ki 1,000 tylli ki ksing tem tynrai ha ka jingïatem kaba i-shongkun, ha ryngkat ka jingangnud ban ïoh ïa ka jingjop khnang ban ïoh rung ha ka ‘Guinness World Records’ (GWR),” ong ka komiti 100 ksing ka tamasa Wangala.
“Kane ka jingthmu ka ban sah kynmaw ha ka histori ka thmu ban pyninam ïa ka pateng ïeid jingrwai bad ka put ka tem ki Garo ha ka rynsan jong ka ri bad ka pyrthei kumjuh,” ka la bynrap.
Ïa kane ka jingpynbna la pynbna da ka komiti 100 ksing jong ka tamasa Wangala bad ka Media and Publicity Sub-Committee jong ka jingrakhe Jubili Ksiar 2026.
Hadien sanphew snem ba la sdang, kane ka tamasa ka la nangroi sha ka jingrakhe kolshor kaba heh tam jong ki jaidbynriew Garo.
“Ka tamasa 100 ksing Wangala ka dei ka tamasa kolshor kaba heh tam bad kaba la rakhe bha jong ki jaidbynriew Garo, kaba pyninam ïa ka jinglong pateng tynrai bariewspah jong ngi, ka put ka tem tynrai, ki jaiñ ki nep baitynnad, ki jingshad, ki jingleh niam bad ka mynsiem ïatylli jong ka imlang-sahlang,” la ong ka komiti.
“Ka Jubili Ksiar ka kdew ïa ka jingdap 50 phew snem jong ka jingpynneh-pynsah kumjuh ka jingkyntiew ïa ka snap lariti jong ki Garo,” ka la bynrap.
Kane ka tamasa kaba saw sngi, la khmih lynti ba kan khring da ki hajar ngut ki nongwan jngohkai, ki kynhun ki ban pyni la ka kolshor, ki nongshad bad ki ‘riew pawkhmat na kylleng ka Jylla, ka Thaiñ Shatei Lam Mihngi bad shabar, ka ban pynkylla ïa ka Chibragre sha ka jaka pdeng ba kongsan jong ka lariti ki Garo.
Naduh ka jingsawa sur jong ki ksing haduh ki jingshad tynrai baitynnad, ki jingleh niam bad ki jingkhawai-dawai jong ka imlang-sahlang, ka Jubili Ksiar ka kular ban long ka jingrakhe ïa ka pateng, ka jingsarong bad jingïatylli – 50 snem ha ka jingpynkhreh.
