Shillong, Naiwieng 09
Ka kynhun ki nongthoh khubor na Shillong, kum shibynta jong ka ‘Press Tour’ ba la pynlong da ka Directorate of Information and Public Relations (DIPR), ka la leit jngoh ïa ka North Garo Hills District ha ka Lah Sngi U Blei, kaba kynthup ïa ka Steshon Rel Mendipathar, kaba dei ka Steshon Rel kaba nyngkong eh ha ka Jylla.
Ha kane ka jingleit jngoh, ka Deputy Commissioner ka North Garo Hills District, ka M.S.N. Marak, IAS, ka la pynpaw ïa ki jingmyntoi kiba kongsan jong ki lad pynïasoh lynti rel na ka bynta ki paidbah ka thaiñ, khamtam ki nongrep, da kaba pynbiang ïa ki lad ki lynti kiba suk bad ba biang dor ban pynpoi ïa ki mar jong ki sha ki jaka ïew shabar ka Jylla.
Ka Marak ka la ong ba ka jingshakri lyngba ki lynti rel ka la ïarap ïa ki nongrep ban pynkit ïa ki jhur ki jhep ba shngiam jong ki lem bad kiwei-kiwei ki mar rep sha Guwahati, ha kaba ki lah ban die ïa ki mar jong ki bad wanphai biang sha la ïing ha kajuh ka sngi. Kane ka la pynduna shibun ïa ka jinglut-jingsep ha ka leit ka wan, ha kajuh ka por da kaba ailad ïa ki nongrep jong ka thaiñ ban ïoh bynta lem ha ki ïew ki hat kiba kham heh.
Ka la kdew ruh ba ka jingdawa ïa ki jhur ki bym ai dawai na kane ka thaiñ ka jur bha ha Guwahati, kaba ailad pat ïa ki nongrep ban pynïaid ïew ïa ki mar rep jong ki. Ka lynti rel ka la ïarap ruh ban pynduna ïa ka dor jong ki mar ba kongsan da kaba pynsuk ha ka ban pynkit bad pynpoi ïa ki mar ki mata beit-beit sha ka distrik.
Haba pynpaw ïa ki jingmyntoi jong ki lad pynïasoh lynti rel haba ïanujor bad ki distrik ki bym don ïa kum kine ki lad pynïasoh, ka Marak ka la ong ba ka jinglut-jingsep ha ka liang ka kit ka bah ha kito ki jaka ka kham heh. Nalor ba ka pynsuk ïa ka leit ka wan jong ki mar rep, ïa ka Steshon Rel Mendipathar la pyndonkam ruh ban pynkit ïa ki mar ki mata sha ki nongbah kiba heh kum sha Kolkata bad Delhi, ha kajuh ka por ban wanrah pat ïa ki mar na ki sorbah sha kane ka thaiñ.
Shuh shuh ka Deputy Commissioner ka la ïathuh ba la nang pynheh shuh-shuh ïa ki jingtei lynti rel, kaba la khmih lynti ban khring shuh ïa bun ngut ki nongbei tyngka kumjuh ban pynshlur ïa ka jingkiew ha ki kam karkhana ha North Garo Hills.
Nalor kane, ka la pynpaw ïa ka jingkyrmen ba ka jingpynbha ha ki lad pynïasoh bad ka jingseng ïa ki karkhana kan wanrah ïa ki lad ki kabu kiba kham bun ha ka ïoh ka kot – ka ban ai jingmyntoi ym tang ïa ki nongrep ha ka distrik hynrei kan ïarap ruh ïa ka roi ka par jong ka Jylla baroh kawei.
