Mairang, Naiwieng 09
Ki paid nongrep kiba shong ba sah ha Eastern West Khasi Hills District kila pynpaw ïa ka jingsngewdiaw bad bynñiaw kaba jur hadien ba u phria ha ryngkat u slap uba jur myn ha ka janmiet sngi U Blei u la lynshop bad pynjulor ïa ki mar rep khamtam ïa u kba uba la dei por ban ot noh.
Katkum ka khubor bala ïoh lum, ki shnong kiba la shah ktah jur na ka jingwan lynshop jong u phria ki kynthup ïa ka Maroid, Nongthymmai, Rikhen, Thangmaw, Mawkohmit, Mawsium, Langñiuh bad ki shnong ba marjan ha kitei ki thaiñ.
Ki nongshong shnong na kitei ki thaiñ kiba rep kba kila ïathuh ba u phria u la sdang hap ha ka por kumba 3.30 eiei janmiet jong ka 8 tarik u Naiwieng bad u la neh kumba 20 minit eiei.
Shuh shuh ki nongrep kila pynpaw ba ki jingthung jingtep naduh u kba, u biskot, ki jhur kila julor lut khait bad kaba pynsngewsih eh ïa ki, ka long ba u kba uba ki la rep ban bam bad uba la dei por ban ot noh mynta kaba sah sa tang u stait bun u kba met u la hap lut.
Kila ïathuh ruh ba u kba uba baroh shi katta ki ju ïoh haduh kumba phra 8 haduh 9 byrni eiei, mynta kin ïoh sa tang kumba shi byrni ne shi byrni duna eiei.
Nangta, nalor kane kila pynpaw ruh ba ha kine ki snem ba la dep ruh ka la don ka jinglynshop u phria ïa ki mar rep ha kaba kila pynpaw ba kila shu phah tang ïa ki dur ha ki bor ba dei peit hynrei kim shym la ïoh jingïarap eiei na ka Sorkar.
Na ka liang ki nongrep na kane ka District, namar kata kila kyntu ïa ka Sorkar ba kan phai khmat lem mynta bad sngew synei lem ïa ki namar kane ka dei ka jinglynshop ki bor mariang ym ka jingleh u briew.
