Imphal, Nailar 06:
Ka tnat Korbar Ri ka Sorkar India ka la pynpoi sa 10 kompani ki pulit Sorkar Pdeng lane ki ‘Central Armed Police Force’ sha ka jylla Manipur ha ka miet Sngi Saitjaiñ hadien ba ka jingïakynad ka dang bteng wat hadien lai bnai tam.
Katkum ki khubor, la ong ba ki 10 kompani ki pulit Sorkar Pdeng, kaba mut ba kumba 900 ngut ki pulit, na ka CRPF, BSF, ITBP bad SSB, ki la poi ha ka miet Sngi Saitjaiñ, bad ïa kine yn buh ba kin pahara ha ki distrik bapher bapher jong ka jylla Manipur.
Lah ban kdew ba hadien ba ka jingïakynad jaitbynriew ka la sdang ha ka 3 tarik Jymmang ha Manipur, ka tnat ïada ri bad ka tnat Korbar Ri ki la phah palat 40,000 ngut ki shipai, shipai Assam Rifles bad ki pulit Sorkar Pdeng sha kane ka jylla.
