Nongstoiñ, Nailar 06:
Kawei ka longkmie kaba dang 21 snem ka la duh noh ïa la ka jong ka jingim ha kaba ka rukom ïap jong ka, ka la pynsuba sniew ïa ki bahaïing hasem jong kane ka longkmie ba ka lah ban shah pynïap dusmon ha ki briew ki bym pat lah satia ban tip ne pynshisha haduh mynta.
Katkum ka tyllong khubor ba la ïohlum la ïathuh ba katei ka jingjia ka la jia ha kawei na ki jaka ha ‘Pyndengkyna” kaba hap hapoh ka shnong Nongtraw, West Khasi Hills.
Ka khubor na ki nongïalam shnong ka ïathuh ba katei ka jingjia ka la jia ha ka miet jong ka 5 tarik Nailar. La ong ba katei ka longkmie ka dei kaba la tip kyrteng kum ka Bibimoris Lyngkhoi bad ka shong ka sah lang bad la u kurim. Hynrei ha ka por kumba 12 baje shiteng synñia, u kurim jong katei ka longkmie u la wan mareh ban khot bad pyntip sha u hynmen jong ka ba ka la khlad noh.
Shuh shuh ka khubor ka la ong ruh ba hadien ba ki bahaïing hasem ki la leit sha katei ka ïing sah ban peit ïa katei ka longkmie ki la lap ïa ki dak ki shin na ki bynta jong ka met jong ka kiba pynsuba halor ka rukom khlad jong ka.
Nalorkata, la ong ba hadien ba ka la don ka jingïakylli tohkit halor katei ka jingjia, u kurim jong katei ka longkmie u la shu jah rngai bad phet krad noh na katei ka jaka.
Ka khubor ka la ong ruh ba halor katei ka jingjia na ka liang ki nongïalam katei ka shnong, ki la pyntip sha ki pulit ha kaba ki pulit ruh ha ka Sngi U Blei mar ïa ïoh jingtip ki la hiar sha katei ka shnong ban lap ïa ka jingshisha bad hadien kane ki la pynkit noh ïa ka met jong katei ka longkmie sha Civil Hospital Nongstoiñ ban pyndep ïa ka ‘post mortem’.
Hadien ba la pyndep ïa ka ‘post-mortem’, ki pulit ki la aiti noh ïa ka met jong katei ka longkmie sha ki bahaïing hasem, bad mynta ka sngi hi, la wanrah noh ïa ka met sha ïing ha katei ka shnong.
Shuh shuh ka khubor ka la ïathuh ruh ba ki pulit ki la pynrung da ka jingujor halor katei ka jingjia (PS Case No: 57(08)2023) hapoh ka kyndon 302 IPC bad ka jingtohkit jong ki ka dang ïaid shakhmat. Ka kyndon 302 IPC ka dei halor ka jingpynsaja ïa kiba donkti ha ka kam pynïap briew.
