Guwahati, Nailar 06:
Ka sorkar Manipur hapoh ka jingïalam jong u N. Biren Singh ka la duh noh ïa ka jingkyrshan na arngut ki MLA ka seng Kuki People’s Alliance (KPA) ha ka Sngi U Blei hadien ba ki la weng noh ïa ka jingkyrshan ka jong ki namar ka jingïakynad ha kane ka jylla kaba la neh mynta la lai bnai tam.
Ha ka shithi sha ka Anusuiya Uikey kaba dei ka Lat ka jylla Manipur, ka Kuki People’s Alliance ka la pyntip ba ka la weng noh ïa ka jingai jingkyrshan ïa ka sorkar BJP hapoh ka jingïalam u N. Biren Singh.
“Hadien ba la peit bniah ïa ka jinglong jingman jong kane ka jingïakynad kaba dang bteng haduh mynta, ngi ïohi ba kam long shuh kaba biang ban bteng ban ai jingkyrshan ïa ka sorkar ba la ïalam da u Myntri Rangbah, u N. Biren Singh. Namarkata, ka KPA ka la rai ban weng noh ïa ka jingai jingkyrshan ïa ka sorkar,” la ong ka shithi ba la thoh da u President ka KPA, u Tongmang Haokip.
Hynrei da ka jingweng noh jong ka KPA ïa ka jingkyrshan kan ym ktah ïa ka sorkar BJP. Kumba ka long mynta, ka BJP marwei ka don haduh 32 ngut ki MLA ha ka ïingdorbar Thawaiñ kaba don 60 ngut ki dkhot. Ka BJP ka ïoh ruh ïa ka jingkyrshan na ki 7 ngut ki MLA ka seng National People’s Party (NPP) bad san ngut ki MLA na ka seng Naga People’s Front. Ki lai ngut kiwei pat ki MLA khlem seng ruh ki ai jingkyrshan ïa kane ka sorkar.
Ka jingkylla ha ka saiñ hima sima ka la wan shi sngi hadien ba ka Manipur ka la sakhi ïa ka jingkhlad ki hynriew ngut ki briew namar ka jingïaumsnam ba kynthup ïa ka jingkawang bom ‘grenade’ ha ka Sngi Saitjaiñ ha khappud jong ka Bishnupur-Churachandpur.
