Shillong, Nailar 07:
Ka jingïakynad ha Manipur ka la pynlong ïa haduh 14,673 ngut ki khynnah skul ba kin phet noh na ki shnong ki thaw kiba ki ju sah baroh shi katta. Kane ka long ka jubab ba la ai ha Ïingdorbar Thawaiñ Rajya Sabha ha ka 7 tarik Nailar da ka Myntri Khynnah ka tnat pule dangle ka Sorkar India, ka Annapurna Devi, ïa ka jingkylli jong ka MP, ka Dola Sen.
Ka Myntri Khynnah ka la batai ba ka sorkar Manipur ka la pyntip ba namar ka jinglong jingman ha Manipur, 14,673 ngut ki khynnah ki la hap ban phet na la ki shnong ki thaw. Ka sorkar ka la pyntip ruh ba la thung da u Nodal Officer ha man kawei-pa-kawei ka jaka sah shipor ki phet wir khnang ban lah ïarap ïa ki khynnah skul ba kin leit pule biang.
Haduh mynta, 13,806 ngut 93.5% na kine ki 14,673 ngut ki khynnah ki la ïoh pule ha ki skul kiba don marjan bad ki jaka sah shipor khlem da donkam ban siew pisa eiei.
Ki don 12 tylli ki distrik ha Manipur ha kaba ki khynnah skul ki la shah ktah jur na ka jingïakynad, bad kiba bun tam eh ki dei na Churachandpur distrik ha kaba ki don haduh 4,099 ngut. Na kine ki 4,099 ngut, 4,033 ngut ki khynnah ki la poi biang sha ki skul kiba don marjan bad ki jaka ba ki shong ki sah mynta.
