Jowai, Nailar 07:
Ka Hynñiewtrep Integrated Territorial Organization (HITO) East bad West Jaiñtia Hills District ki la leit ai da ka dorkhas ha u Chief Executive Member ka Jaiñtia Hills Autonomous District Council ha kaba ïadei bad ka jingwan ki karkhana dewbilat thymmai ba tip kyrteng kum ka MegaBond Cement ha ka shnong Wahïajer Elaka Narpuh, East Jaiñtia Hills District.
Ka HITO ha ka kyrwoh ba phah da u President ka East Jaiñtia u Deibormi Rymbai bad u General Secretary ka West Jaiñtia Hills, ki la ong ba ha ka jingïakynduh bad u CEM ka JHADC u Bah Thombor Shiwat, u la kubur ba ka don ka kompeni kaba thymmai kaba la wan mih sha ka JHADC ban pan NOC hynrei na ka liang jong ka council ka la kyntait bad ka la bthah ba kan pynbiang shwa ïa baroh ki jingdonkam bad ki kot ki sla bad hadien yn sa bishar bad yn rai la yn pdiang ne kyntait ïa ka jingpan jong katei ka kompeni bad haduh mynta ka JHADC kam shym la ai NOC ne kino-kino ki dulir ha kaba ïadei bad ki karkhana dewbilat ba wan thymmai ha rilum Jaiñtia.
Ha kaba ïadei bad ka jingthmu ka sorkar pdeng bad ka sorkar jylla ban pynpoi lynti rel haduh East Jaiñtia Hills District, na ka liang u CEM u la ong ba kumba ka long mynta ka JHADC hi kan nym pdiang ïa ka lynti rel bad ka la don ka komiti kaba khmih ïa kane ka kam bad na ka liang ka council hi kam pat don kano-kano ka jingïakren ha kaba ïadei bad ka lynti rel. Kumta na ka liang u CEM u la kren shai ba ka council kan nym lah ban pdiang ïa ka lynti rel kumba ka long mynta, la ong ka kyrwoh na ka HITO.
Ha kaba ïadei bad ka lynti rel ka seng ka la dawa na ka JHADC kam dei ban ai jingbit bad NOC da lei lei ruh kat bym pat lah ban pyntreikam ïa ki aiñ ban ïada bad tehlakam ïa ka jingrung jingmih ki briew ba nabar ka jylla bad khamtam lada ka sorkar kan ïaid shakhmat ban pynpoi ïa ka lynti rel kan long ka jingïam briew ha ka jylla namar ha ka Khasi Jaiñtia bun kiba im ja na kaba kamai da ki trok kiba kit ïa ki mar ba har rukom.
Shuh shuh ka seng ka la kyntu ruh ïa ki seng jong ki trai kali ban ïatreilang ha kane ka bynta ban khanglad ïa ka jingthmu ka sorkar ban pynpoi ïa ka lynti rel sha ka bri u Hynñiewtrep, la pynkut ka kyrwoh na ka HITO.
