Nongstoiñ, Nailar 07:
Hadien ka jingkynrei jong ki kam sniew khamtam ha ka por mynmiet hapoh ka Ïew Nongstoiñ, ha ka sngi Nyngkong ka taïew ki nongïalam ka KSU Nongstoiñ Circle ki la hiar sha kane ka ïew ban khynra naphang ïa ki briew kiba dang ïa shong dih ïa ki jingdih pynbuaid.
Ka seng ka la hiar jurip bad khynra hapoh ka jingïalam jong u samla Willbest Wanniang kum President bad u samla Comingstar Kharsyntiew kum General Secretary. Na ka liang kine nongïalam ki la ong ba ka jingwan khynra ka seng ka long namar ka jingjyllei ki kam sniew hapoh kane ka ïew kaba la pyntieng pynsmiej ruh ïa kiba bun ki nongshong ïew bad kiba ïaid ba ïeng khamtam ha ki por janmiet.
Shuh shuh ki la ïathuh ruh ba ha katei jingleit khynra ka KSU ka la lap ïa bun ngut ki briew kiba dang ïa dih ïa ki jingdih pynbuaid kum ka kyiad bad injek drok ha ki lynti ki syngkien.
Kumta ka seng ka la maham ïa baroh ki nongdih bad nongdie drok ba kim bit ban dang wan ha katei ka ïew. La maham ruh ïa kino-kino ki briew kiba leit shong ban dih kyiad ba lada nangne shakhmat ka seng kan lap kan leh da kaba tyngeh.
