Shillong, Nailar 07:
Lai ngut ki briew ki la khlad noh ha shen bad 2 ngut kiwei pat ki la mynsaw jur hadien ba ka trok kaba ki shong ka la hap shapoh riat hajan lad Mawkhap kaba don ha lynti na Shillong-Dawki.
Kane ka la jia ha ka miet jong ka Sngi U Blei. Kane ka trok kaba don ïa u nombor ML05-G-9528, ka dei kaba la ñiah da u Yomiki Kharshandi.
Haba ïakren bad u Superintendent of Police (SP) ka East Khasi Hills, Bah Sylvester Nongtnger, u la ïathuh ba kane ka trok ka dei kaba dang wan kiew na ka thaiñ Pynursla sha Laitlyngkot, hynrei ha ka por kumba 11 baje mynmiet, namar ka jingthut jong ka ‘brake’, u nongñiah u la phah shna noh ha Langkyrdem bad ynda la dep ki la mih noh na kane ka jaka.
U SP u la ong, hynrei ha ka por ba poi ha kawei ka jaka ba long khongdong ha Khoh-yiar hajan ka lad Mawkhap jong ka surokbah NH-40, kynsan ka la don ka jingthut ha u gear; kata ha ka por ba u nongñiah u la mut ban thep ‘gear’ hynrei u la sahkut bad ka kali ka la tyllun noh shadien bad hap sha riat.
La ïathuh ba ha kane ka trok ki la don haduh san ngut ki briew. Hadien ba ka la hap sha riat, uwei napdeng ki san ngut kata u Bansiew Khongklian wat hapdeng ka jingmynsaw, u la par suki-suki bad kiew na riat haduh ban da poi ha surok bah, ban pan pat ka jingïarap na ki briew.
U SP u la pyntip ba kane ka kali ka dei kaba mih na Pynursla ban wan sha ka thaiñ Laitlyngkot bad ka dei ruh kaba kit ïa ki masi.
Shuh shuh na ka liang jong u SP u la ïathuh ba na ka liang jong ki pulit mar ïa ïoh jingtip ki la hiar sha katei ka jaka. Ynda la hiar shapoh, la lap ïa u nongñiah ka kali u Bah Yomiki Kharshandi uba la mynsaw jur bad dang ring mynsiem, katba lai ngut kiwei pat ki la khlad noh ha shen.
Kine lai ngut kiba la khlad noh ki dei ba la tip kyrteng kum u Bah Kyndaiborlang Kurbah na ka shnong Kseh Mawnai, u Bah Banpeitlang Marbaniang na ka shnong Nongshken Mawdang bad u Bah Welbokstar Sohlang na ka shnong Kseh Mawnai.
Ha kaba ïadei bad kane ka jingjia, na ka liang ki pulit ki la pynrung case hapoh ka thanat Pynursla bad ka jingtohkit ka la ïaid shakhmat.
