Khliehriat, Nailar 07:
Ki bor pynïaid distrik jong ka East Jaiñtia Hills ki la pynlong ka jingpynkup burom ïa ki nonghikai Class 8, 9 bad 10 ha ka thong treikam “Ka Lawei” ha Auditorium Hall ka Don Bosco College, Byndihati ha ka Lah Sngi U Blei.
Ha kane ka sngi la donlang u Myntri ka tnat pule puthi ka jylla, u Rakkam A Sangma kum u kongsan, ka MLA Sutnga-Saipung kum ka symbud kongsan ha ka jingdonlang u Bah HM Shangpliang kum nongaibuit ka tnat pule puthi.
Ka “Ka Lawei Project” ka dei ka thong treikam ba la sdang da ka bor distrik ban kyntiew ïa ka pule puthi da kaba pyndonkam ïa ki tiar stad ka juk mynta ne Digital Learning khamtam sha ki shnong kiba don sha khapsor bad la buh ruh ïa ki Digital Smart Classroom ha ki 50 tylli ki skul ka distrik t.
Ka jingnang jingstad ka dei kaba kongsan tam ban pynkhaiñ ïa ka imlang-sahlang ka jylla bad ka ri, la ong u Rakkam A. Sangma bad u la bynrap ba ka Lawei Project ka dei ban pynkhlaiñ ïa ka jingnang jingstad bad ka pule puthi da kaba pynshlur ïa ki nonghikai ban pynjanai ïa ka rukom hikai na bynta ka bha ka miat jong ki khynnah.
Ka Santa Mary Shylla ha ka jingkren ka la kyntu ïa ki nonghikai ban shakri hok bad ai ka jingnang jingstad kaba paka tam ïa ki khynnah bad ka la ïaroh ïa ki bor distrik hapoh ka jingïalam u Deputy Commissioner ba la pyntreikam ïa ka “Ka Lawei Project”, ka ban pynjanai ïa ka rukom hikai ïa ki khynnah.
Shuh shuh ka la ïathuh ba na ka Special Rural Works Programme (SRWP) yn ai T.10 lak sha ki skul ka distrik ban thied ïa ki Backup Power Systems ne ki tiar pynneh bording khnang ban nym thut haba hikai ïa ki khynnah.
U Bah HM Shangpliang ha ka jingkren u kyrmen ba “Ka Lawei Project” kan ïarap ïa ki khynnah ha ka distrik bad u khmih lynti ba yn pyntreikam ha kiba bun tylli ki skul.
Kiwei kiba la ai jingkren ki long u Deputy Commissioner ka District, u A. Baranwal, u G. Warjri, Addl. Deputy Commissioner, P. Dkhar, District School Education Officer bad u Father George Lyngkhoi, Principal Don Bosco College, Byndihati.
Ha kane ka sngi la ai sngewbha ruh ïa ki tiar sah jingkynmaw sha ki 9 ngut ki nonghikai Mathematics, Science bad Social Science ha ki Class 8, 9, bad 10.
La sam ruh ïa ki khusnam sha lai tylli ki skul kiba la pynkhreh bha ïa ka “Ka Lawei Project”.
Hadien kane u Myntri u la leit jngoh ïa ki Smart Digital Classroom ka Byndihati Secondary School, Byndihati.
