Shillong, Nailar 07:
Ka North Eastern Hill University (NEHU) ka khot ka wer ïa baroh na bynta ka jingïatreilang khnang ba ka jingpyntreikam ïa ka National Education Policy (NEP), 2020 kan long kaba ïaid beit ïaid ryntih naduh ka samoi pule 2023-24.
“U Vice-Chancellor ka NEHU, u Prof. Prabha Shankar Shukla u kyrpad jur ïa baroh ban ïatreilang bad ka skulbah, kolej, samla pule, bad ka Sorkar Jylla ban ïasnoh kti lang, ha kajuh ka por ban pyntikna ïa ka jingpyntreikam kaba ïaid beit ïaid ryntih jong ka NEP-2020 naduh kane ka samoi pule 2023-24 – da kaba ïada ïa ka lawei jong ki samla pule,” la ong ka kyrwoh na u PRO ka NEHU, Dr. Davidson Pyngrope.
U la ong ruh ba ka skulbah ka long kaba kloi ban kner ka jingkyrshan ha ka liang ka pule-puthi sha kito ki kolej kiba la pynïasoh bad ka.
Ka kyrwoh ka ong ruh ba ka jingpyntreikam ïa ka NEP-2020 hapoh Meghalaya ka long u mawmer u ban wanrah jingkylla ha ka jinglong-jingman ka pule-puthi hapoh ka Jylla bad ka jingpyntreikam ïa ka ha ka ‘Syllabi’ ka FYUP naduh ka samoi pule 2023-24 ka long ka jingkyrmen na bynta ki khun samla ka Jylla.
“Kin don beit ki jingeh ha kaba sdang, hynrei ka skulbah lem bad baroh kiba don ka jingkitkhlieh ïa kane ka bynta ka skhem jingmut ban pynwandur na bynta ka jingmyntoi jong ki samla pule ka Jylla,” la ong ka kyrwoh na u PRO.
Ha kawei ka liang, u Dr. Pyngrope u la ong ba kano-kano ka jingpynslem ha ka ban pyntreikam ïa ka NEP ka lah ban ïalam sha ka jingjulor ka ban ym lah shuh ban maramot.
“Ki samla pule kin sahdien shi snem bad kito kiba pyndep ïa ka jingpule jong ki (Graduate) ha u snem 2026 ki lah ban ïakynduh jingeh ha ka liang ka jingrung klas na bynta ki jingpule ba shajrong ha ki kiwei-kiwei ki skulbah ka Sorkar Pdeng naba ki la bud ryntih ïa ka NEP 2020,” u la ong.
Haba pynkynmaw ba ka NEHU ka dei ruh ka skulbah ka Sorkar Pdeng kaba la teh da ki kyndon jong ka Sorkar Pdeng, u la ong ba ka skulbah kumta ka dei ban bud ryntih ïa kane naba ka jingbym pyntreikam ïa ka NEP-2020 ka lah ban ktah ïa ka jingïoh rung klas jong ki samla pule wat ha NEHU kumjuh.
“Ka jingbym pyntreikam ïa ka NEP-2020 ka lah ruh ban pyrkhing ïa ki kolej ba pynïasoh ban lum ïa ki jingdon-jingem na ka ‘Central Pool’. Kumta ka long kaba donkam ban leh eiei noh kloi bad kynthup noh ïa kane ka mat treikam khnang ban kiar na kiei-kiei ki bym sngewtynnad,” u la ong.
Ka kyrwoh ka la kdew ruh ba ha ka jingïalang ba 110 jong ka Academic Council, ka skulbah ka la mynjur ïa ki ‘Ordinance’, kyndon bad ‘Syllabi’ jong ka Four Year Undergraduate Programme (FYUP) katkum ka NEP-2020.
Shuh shuh ha ka jingïalang ba 187 jong ka Executive Council, la rai ban pyntreikam ïa ka ‘Syllabi’ ka FYUP naduh ka samoi pule 2023-24 bad hadien kane ka rai, la pynlong ïa ka jingïalang hapdeng ki Principal jong ki kolej (ba pynïasoh bad ka NEHU) bad ki ophisar ka NEHU ha ka 21 tarik u bnai ba la dep, ha kaba baroh ki Principal kiba la don ha katei ka jingïalang ki la pynpaw ka jingmynjur ban pyntreikam ïa ka ‘Syllabi’ ka FYUP naduh ka samoi pule ba mynta, ka ban sdang naduh ka 1tarik u Nailar, 2023.
