Shillong, Nailar 07:
Ki pulit pynïaid kali (traffic police) ki hap ban trei hapdeng ki jingeh ban pynïaid kali ha nongbah Shillong kaba la sakhi ïa ka dheng kali kaba shyrkhei katba nang mih ki sngi namar ka jingbun ki kali bad kawei pat ka dei ka jingñiah khlem pyrkhat ïa ki kali kaba wanrah shuh shuh ïa ka dheng kali man la ka sngi.
Ha nongbah Shillong kaba dei ka nongbah kaba la ïar bad khapngiah ki surok, ki pulit pynïaid kali ki duna bha.
Da ka jingdonlang ki pulit na ka tnat Homeguards, ka jingkhia jong ka kam jong ki pulit pynïaid kali ha Shillong ka kham sting khyndiat, bad ki pulit pynïaid kali ki dang donkam briew shuh shuh hapoh ka tnat Traffic.
Ki kali naduh ki saw shaka bad ar shaka kiba dei tang ki ML05 lane tang ha East Khasi Hills district, ki la bun shaba palat ha Shillong. Lada kheiñlang ïa ki kali kiba wan na shabar ka East Khasi Hills district lei lei, bad kiba wan Assam bad na kiwei ki Jylla, ka nongbah Shillong ka la shlei tang da ki kali bad nang pynjur ïa ka dheng kali man la ka sngi.
Haba ïakren bad u Superintendent of Police (SP) Traffic ka East Khasi Hills district, u Dr Dara Aswaghosh u la ong ba ka dheng kali ka dei kaba ki paidbah ki mad jingeh man la ka sngi da ka jingbun ki kali ryngkat ki surok kiba rit.
U la ong ba ki pulit pynïaid kali ki dang duna bad donkam shuh ban pynbun ha kaba ka Sorkar ruh ka dang shim ki lad haba ïadei bad kane.
U la ong ba katkum ka jingmang kaba naduh u snem 2012, ki pulit pynïaid kali ki don 299 ngut ha Shillong, bad da ka jingdon kiba kiew kyrdan mynta ki don 275 ngut.
U Dr Dara u la ong ba ka tnat pulit ka la ïoh jingïarap ruh na ka tnat Homeguards ha kaba ki la don 104 ngut kiba treilang bad ka tnat Traffic ban pynïaid kali man la ka sngi.
U la ïathuh ba ka tnat pulit ka la thoh ruh sha ka Sorkar ban mang shuh sa 96 ngut ki pulit Homeguards na ka bynta ban pynïaid kali bad ïa kane dang ap ban ïoh ka jingmynjur.
Une u SP Traffic u la ïathuh ba nalor ki lad jong ki surok rit, ki don haduh 70 tylli ki jaka ha kylleng ka nongbah Shillong kiba ki pulit pynïaid kali ki leit ban pyndep ïa ka kamram na ka bynta ka jingbit jingbiang ki paidbah.
Hynrei u la ong ba ka jingbun ki kali khamtam ha surokbah ba don ki lad kum hakhmat KHADC, Mawlai Petrol Pump kaba ktah lang sha Mawdatbaki Stand Bus, Rilbong Point (MES) kaba wan ki kali na Laimer, bad Anjalee Point ka dei kaba shitom bha ban weng ïa ka dheng kali man la ka sngi, namar ki kali ki wan lut na kadiang bad kamon.
U la ong ba ruh ki pulit pynïaid kali kiba leit da ki ar shaka lane ‘flying squad’ ruh ki don ban ïaid ha surokbah bad kiwei ki bynta ka nongbah haba jur ka dheng kali ban ïarap pynbeit ïa ka rukom ïaid kali kum ha ka por ba pynlong ïa ki jingïalang paidbah, jingïalehkai phutbol bad ki tamasa.
U la ong ruh ba ka dheng kali kaba jur ka dei ha ka por ba sdang skul bad por wai skul namar ki kmie ki kpa ki wan buh bad wan shaw da ki kali lajong bad ka jingdheng kali ka jur bha naduh IGP, All Saint, ter ter shaduh Laitumkhrah bad ki kali ki sahkut bad shah ktah sha Khyndai Lad bad Motphran.
Kumta u la ong ba lada pyndonkam noh da ki bos skul ban wan buh bad wan shaw ïa ki khynnah skul kan long ka jingïarap haduh katta katta ban pynduna ïa ka dheng kali.
Ki kali tang ki ML05, ki don palat 1.60 lak tylli ha Shillong kynthup ha East Khasi Hills district baroh kawei.
Tang ki ar shaka kiba dei ki ML05 ki don haduh 72,309 tylli haduh ka 21 tarik Naitung, 2023 bad ki saw shaka kiba dei ki ML05 ki don 87,718 tylli haduh ka 21 tarik Naitung, 2023.
Baroh ki kali ar shaka bad saw shaka kiba dei ki ML05 ha East Khasi Hills district ki don haduh 1,60,027 tylli.
