Nongstoiñ, Nailar 07:
Hadien ba kawei ka longkmie kaba dang 21 snem ka la duh noh ïa la ka jingim ha kaba ka rukom ïap jong ka, ka la pynsuba sniew ruh wat ïa ki bahaïing. Ka daw tynrai kat haduh mynta ym pat lah satia ban lap haba ïadei bad ka jingïap jong katei ka longkmie. Kane ka jingjia ka la jia ha kawei na ki jaka ha Pyndengkyna kaba hap hapoh ka shnong Nongtraw ha West Khasi Hills, ha ka 7 tarik mynta u bnai. Kumta na ka liang ki bahaïing jong u Bah Badonbor Rongrin uba dei u kurim jong katei ka longkmie, ki la leit ban aiti noh ïa u sha ki pulit ka Nongstoiñ.
U kñi rangbah jong u Badonbor, Bah C Rongrin, haba kren bad ki nongthoh khubor hadien ba ki la leit ban aiti ïa u Badonbor Rongrin ha ki pulit, u la ong ba katkum ka jingtip ka jong u, namar ba u la ïohsngew sa tang da ka phone bad u la pyrshang katba lah ban wad jingtip hynrei la shem ba kata ka jingtip ka long ba kata ka jingjia ki don tang hapdeng ki jong ki baroh ar ngut.
“Nga, ngam pat da ïoh jingshai bha hynrei mynnin ka sngi la ïohsngew ba la pynkit ïa kane longkmie sha hospital ban leh ïa ka post mortem bad ha ka sngi nyngkong ka taïew nga la ïoh ïa ka jingshai bad haba wad shaei une u pyrsa u don bad kumno u long la ïohsngew ba u la phet na katei ka ïing sha Mawlangkew kaba dei ka shnong kur bad nga sngewtynnad ki kur ki jait ruh ki la phah ïa u ba un leit hi dalade shi syndon sha thanat namar ba kata ka kam la sngewthuh ba lada ka long ha kano-kano ka dur ruh ka dei ka kamram ka jong u ban leit mih,” la ong u Bah Rongrin.
Shuh shuh u la ïathuh ba ynda u la poi ha Nongstoiñ, u dang pyrkhat ba u la don sha thanat, hynrei u ïohsngew pynban ba u dang don sha kyndong um nud shuh ban leit mih sha thnnat. Kumta na ka liang jong u, u la ïasyllok ïa ki hynmen ki para ban shim beit ïa u ban aiti noh sha ki pulit. Kumta ki la ïoh ban aiti sha ki pulit.
Nangta, u la ong ruh ba katkum ka jingkylli jong u, utei u khun pyrsa u la ïathuh ha katei ka por, u dang leit kai sha ïing ki para marjan bad ynda u la wanphai u la lap pynban ïa ka lok ba ka la sdien phasi ïalade. Kumta u la pynlaw noh ïa u ksai bad pynthiah ïa ka ha jingthiah.
Haba jubab pat ba balei pat utei u briew (Badonbor) u phet rieh, u kñi u la ong ba katkum ka jingïathuh jong u, ka dei namar ba ki bahaïing jong katei ka kynthei ki la byrngem pynïap bad tep lang ïa u bad ka lok jong u.
Lah ban kdew hangne bad katkum tyllong khubor ba la ïoh lum na ki nongïalam shnong, la ong ba katei ka jingjia ka la jia ha ka miet jong ka 5 tarik u Nailar. La ong ba katei ka longkmie kaba la tip kyrteng kum ka Bibimoris Lyngkhoi, 21 snem ka shong ka sah lang bad la u jong u kurim. Hynrei ha ka por kumba 12 baje eiei mynmiet, u kurim jong katei ka longkmie u la wan mareh ban khot bad pyntip sha u hynmen jong ka ba ka la khlad.
Ka khubor ka ong ruh ba halor katei ka jingjia, ki nongïalam katei ka shnong, ki la pyntip noh ïa katei ka jingjia sha ki pulit. Na ka liang ki pulit ruh ha ka Sngi U Blei mar-mar ki la hiar sha katei ka shnong ban lap ïa ka jingshisha. Hadien kata ki la pynkit noh ïa ka met ïap jong katei ka longkmie sha Civil Hospital Nongstoiñ ban pyndep ïa ka post mortem. Kumta na ka liang ki pulit ki la pynrung ruh ïa ka case katkum ka PS Case No: 57(08)2023 u/s 302 IPC bad ka jingtohkit ka la ïaid shakhmat.
