Shillong, Nailar 07:
Ki pulit ka West Garo Hills ha ka miet jong ka Sngi U Blei ki la ïoh kem noh ïa uwei u briew ba la tip kyrteng kum u Chanda M. Sangma halor ka jingsuba ba u la donkti ban pynïap ïa kawei ka khynnah 12 snem.
Katkum ka jingtip ba la ïoh lum na ki pulit mynta ka sngi, la ïathuh ba ïa u Chanda, 32 snem ka rta, la ïohi da ki nongshong shnong jong kawei ka shnong ha West Garo Hills. Ki pulit ka Phulbari, hadien ba ki la ïoh ïa kane ka khubor, ki la pynlong ïa ka jingthwet ïa u Chanda bad hadien bun kynta jong ka jingwad, ki la lap bad ïoh kem ïa une u briew.
Lah ban pynkynmaw ba ha ka 1 tarik Nailar, ki pulit ki la ïoh tam ïa ka metïap jong ka khynnah kaba dang 12 snem ka rta na kawei ka shnong kaba hap ha thanat Phulbari. Ïa kane ka khynnah la pynïap dusmon da kaba ot na ryndang.
Shuh shuh na ka liang jong ki pulit ki la suba jur ba ka jingshah pynïap dusmon jong kane ka khynnah ka lah ban jia ha ka por ba ka la don marwei ha ïing. Hadien ba ka la mih na la ïing bad ki kmie ki kpa ban leit sha ïing ïap briew, la bthah ïa kane ka khynnah ba kan leit phai sha ïing ban pynlip ïa ka bording hynrei kam shym la wan phai shuh naduh kata ka khyllipmat.
Dei tat haduh ka por ba ki kmie ki kpa ki la wan phai sha la ïing kin sa lap pynban ïa la ka khun kaba la thiah lyngktar ha madan hapdeng ka jinglyngkien ka snam.
