Nongstoiñ, Nailar 07:
Kawei ka trok ‘Dumper’ bad kawei ka Transit Mixer jong ka kompeni kaba pyntrei ïa ka surok Nongstoiñ-Wahkaji, ki la shah thang dusmon ha ki runar ki bym lah satia ban tip ki dei kiei.
Katkum ka tyllong khubor ba la ïoh lum la ong ba lai ngut ki briew kiba la kah dur khmat ki la leit ban thang dusmon ïa katei ka trok dumper bad kawei ka transit mixer jong ka kompeni kaba pyntrei ïa ka surok Nongstoiñ-Wahkaji.
Shuh shuh la ïathuh ba katei ka la jia ha ka step phyrngab jong ka 7 tarik u Nailar ha ki por kumba 1.30 eiei ha kawei na ki jaka sah (camp) kaba don ha kawei na ki jaka ha ka shnong Mawthungkper ha West Khasi Hills ha kaba kitei lai ngut ki la rung ha katei ka jaka sah jong ka kompeni bad ki la wiang ding ïa ka trok bad ka transit mixer.
Ka khubor ka ong ruh ba ha katei ka por u nongñiah jong ka trok u dang ïohthiah hapoh katei kali bad u la ïohsngew ïa ka jingkhluit kaba wan napoh katei ka trok. Kumta u la khie joit bad plie ïa ka jingkhang kali ban mih sha bar, hynrei u la lap pat ïa uwei u briew uba dang ïeng hajan jong ka trok hynrei um shym la ithuh namar ba u la kah ïa ka dur khmat.
Shuh shuh ka khubor ka ong ruh ba kitei ki briew ki la rah ryngkat ki klong sharak ha ka pla da ka jingthmu ban wiang ding bad pynjot ïa ki tiar ki tar jong ka kompeni kiba don ha katei ka jaka.
Kumta halor kane ka jingjia, na ka liang jong ki pulit ki la pynrung ïa ka case bad ka jingthwet ïa ki briew ba donkti ka dang ïaid shakhmat.
