Jowai, Nailar 07:
Ka United Hynñiewtrep Movement (UHM), East Jaiñtia Hills District ka la ai por shi taïew ïa u Chief Executive Member (CEM) ka JHADC ban pynlong ka jingkhynra trading license bad labour license (laisen khaïi bad nongbylla) pyrshah ïa ki bar jylla hapoh East Jaiñtia Hills, lym kumta ka seng kan shim hi ïa ki sienjam ban pynlong ka jingkhynra.
Kane ka la wan long ruh hadien ba ka seng UHM-EJH ka la leit ban aiti ïa ka dorkhas sha u CEM ka Jaiñtia Hills Autonomous District Council (JHADC) da kaba buh ka jingkyrpad na ka bynta ban pynlong ka jingkhynra trading license bad labour license pyrshah ïa ki bar jylla hapoh ka district.
Ka UHM-EJHD ha ka kyrwoh lyngba u President, u Brosenly Siangshai ka pynpaw ka jingsngewkhia kaba jur ha kaba ïadei bad ki kam khaïi beaiñ jong ki bar jylla kumjuh ki nongwan bylla ki bym don satia ïa ki kot ki sla kiba biang ban leh ïa ki kam khaïi pateng bad ban trei ban ktah hapoh ka district.
Na ka liang ka seng ka la ong ruh ba kine ki bar jylla ki la shu wan khaïi bad wan trei laitluid hapoh kane ka district khlem da kheiñ snep ne burom ïa ka District Council kaba dei khmih halor kane ka bynta.
Kumta ka seng ka kyntu jur ïa ka JHADC lyngba ka tnat khaïi pateng (Trade) ba dei ban pynlong da ka jingkhynra pyrshah ïa kine ki bar jylla kiba wan ban knieh ïa ka pliang ja jong ki trai ri trai muluk lyngba ki jingleh ïa ki kam khaïi pateng bad wad trei wan ktah beaiñ hapoh ka district.
