Shillong, Nailar 07:
Uwei u nongshong shnong ba la tip kyrteng kum u Champer M. Sangma u la mudui sha ka Meghalaya High Court da ka mukotduma halor ka jingkynnoh ba ki jingkheiñ bad ki jingthoh jingtar ki duna bad nangne ka paw ba sorkar ka ïatreilang bad ki briew kiba kwah ban khaïi shabar ri ïa u dewïong ba la shu tih be-aiñ na kane ka jylla hynrei ba la kam pat ba la ïoh na kiwei pat ki jaka.
U nongmudui u la kynnoh ruh ba ka Jaimaa Coal Private Limited ka la donkti ha kane ka kam namar ki briew kiba pynïaid ïa kane ka kompani ki dei ruh kiba don sa kawei pat ka kompani ba la tip kum ka Vaishno Devi Traders Private Limited bad kane ka kyrteng ka la paw ha kiwei pat ki mukotduma kiba mynshwa. La kynnoh ba la pyndonkam ïa kane ka Vaishno Devi Traders Private Limited ban khaïi be-aiñ shabar ri ïa u dewïong.
Nalorkata, u Champer u la kynnoh ba palat 440 tylli ki trok ki la donkti ban kit ïa kumba 5,340 Metric Ton u dewïong na East Jaiñtia Hills. Hynrei kaba lyngngoh pat ka long ba ka sorkar jylla kam don satia ïa ki jingkheiñ halor kine haba la pan jingtip lyngba ka aiñ Right to Information Act, 2005.
U Champer u la kam ba katkum ki kyndon aiñ, la dei ban buh ïa ki jingkheiñ bad ki jingthoh jingtar bad ka sorkar jylla ka dei ban pyni ïa kita haba don ba pan jingtip.
Shuh shuh u nongmudui u la ong ba ïa ki trok la dei ban thew la kumno-kumno ha kawei na ki jaka thew lane ‘weigh bridge’ hashwa ba kin ïoh ban ïaid bad ïa ki jingthoh halor kita ki trok ba la shah thew ki dei ban don ha kata ka ‘weigh bridge’ ba la thew ïa ki.
Hynrei, haba la pan jingtip lyngba ka RTI Act, u nongmudui u la ong ba ki briew sorkar ki la kam ba kim don satia ïa kino-kino ki jingkheiñ ne jingthoh jingtar ha kaba ïadei bad ka jingthew ïa ki trok.
“Ngi donkam ban ïoh ïa ka jingpynshai halor kane. Ka sorkar ka dei ban ai jubab ïa kitei ki jingkynnoh bad u Secretary ka tnat Transport un hap ban ai da ka jingthoh. Kane ka jingthoh ka dei ban poi hapoh lai taïew naduh mynta ka sngi,” la ong ka High Court ha ka Lah Sngi U Blei haba shong bishar ïa ka mukotduma ba la ai da u Champer.
Ka jingbishar ïa katei ka mukotduma kan long biang ha ka 31 tarik Nailar, 2023.
