Shillong, Nailar 07:
Ka Meghalaya College Teachers’ Association (MCTA) ka la shim ïa ka rai ban bteng ïa ka jingïakhih jong ka (Non-Cooperation Movement – NCM) pyrshah ïa ka North-Eastern Hill University (NEHU) haba ïadei bad ka jingpyntreikam ïa ka National Education Policy (NEP), 2020.
Ïa katei ka rai la shim ha ka jingïalang jong ka seng kaba la long ha ka 5 tarik mynta u bnai.
“Ka MCTA ka ïeng skhem ha ka nongrim namar ka jingbym ïoh jubab halor ki jingdawa bad jingsngewkhia ba dei hok. Ka seng ka ngeit skhem ba ka NEP ka don ïa ki jingeh kiba lah ban ktah kylla ïa ka jinglong-jingman ka pule-puthi bad ka bha ka miat jong ki samla pule ha baroh ki liang,” la ong u General Secretary ka seng, Dr. A.W. Rani ha ka kyrwoh khubor.
Ka MCTA kumta ka ban jur halor ka jingdonkam jong ka jingïamir jingmut kaba bniah bad ka NEHU lem bad ka Sorkar ban khmih ïa kitei ki jingeh, ha kajuh ka por ban pyntikna ba ka jingpyntreikam ïa ka NEP kan ym ïapeiñ ha ka liang ka kyrdan jong ka pule-puthi bad ka jingbym shah liang hapoh ka Jylla.
Ka seng ka kyrmen skhem ba kane ka jingïakhih kan pynsngewthuh ïa ki bor ba dei khmih ban pyrkhat halor ki jingdawa bad ban trei na bynta ban pynwandur ïa ka mat treikam kaba kham bit kham biang ha ka pule-puthi na bynta ka Jylla.
Haba kdew ïa ki jingeh haba ïadei bad ka jingpyntreikam ïa ka NEP, ka seng ka la ong ba ka rai ban pyntreikam ïa kane ka mat treikam ka buh jingkylli ha kiba bun ki liang.
“Da kaba pdiang ïa kane ka mat treikam ka bym don ïa ka nongrim katkum ka aiñ naba ym shym la mynjur da ka Academic Council (AC) lah ban ïohi ba ka pynneh ïa kaei-kaei ka bym long katkum ki kyndon aiñ, ha kawei ka liang kaba kyntait ne tyngkhuh ïa ka thong jong ka pule-puthi ban kyntiew ïa ka rukom pyrkhat ba jylliew kumjuh ïa ki nongrim ka synshar paidbah,” la ong u Dr. Rani.
Haba kdew ba ïa ka NEP la wanrah khlem ka jingbuh ryntih kaba biang na bynta ki nonghikai ban khmih ïa ka ‘Curriculum’ bathymmai, u la ong, “Kane ka kynthup ïa ka jingkhmih bniah ïa ka jingdon ha ka jingpule, jingpynbeit ïa ki sobjek, ban khmih bniah katkum ka ‘Credit Score’, ka ‘Internship’ jong ki samla pule kiba la don lypa nalor kiwei-kiwei.”
Ha kajuh ka por, u la ong ba ym shym la pynbiang ïa ki shlem ai jinghikai ïa ki jingdonkam khnang ba ka jingkynriah kan long kaba seisoh.
U Dr. Rani u la ong ruh ba kam don ka jingïohi jngai lypa ïa ki jingeh ki ban ïakynduh hadien ba la pyntreikam ïa ka NEP naba kim shym la don kino-kino ki jingpynkhreh kiba skhem ban ïaleh pyrshah ïa kine ki jingeh.
U la ong ruh ba ka jingkynthup shuh ïa ki sobjek ha ka ‘Curriculum’ ym tang ba ka ban khia ïa ka kam na bynta ki nonghikai bad samla pule, hynrei ka nang pynjynjar pynban ïa ki bor pynïaid.
“Ha ka jaka ban pynbha ïa ka jinglong-jingman ka pule-puthi, ka lah ban synñiang pynban sha ka jingkhuslai bad jingkulmar jingmut,” u la ong.
Halor ka ‘Skill-based Education’ kaba long ka mat pynleit jingmut kaba kham hakhmat jong ka NEP-2020, ka seng ka tikna ba ki kolej kim don ïa ki nonghikai kiba don ïa ka jingnang-jingtip bad ka jingtbit, jingdon-jingem bad ki lad jingïarap ban kyntiew ïa ka ‘Skill Development’.
Haba pynsngew ba ka Sorkar ka la kiar ban pynbiang ïa ka jingkyrshan pisa na bynta ban pyntreikam ïa ka NEP, u General Secretary u la ong, “Kane ka buh jingeh ïa ki shlem ai jinghikai ha ka liang ka pisa-tyngka – kaba lah ban ïapeiñ ïa ka jinglong-jingman ka pule-puthi bad wanrah shuh ki mawjynthut haba phai sha ka jingpyntreikam.”
U la kdew ruh ba ha ki Jylla ba rit kum ka Meghalaya – kaba duna ha ka jingbun briew, ka long kaba jwat ban pynrung 3000 ngut ki samla pule ha kawei ka shlem ai jinghikai kumba la ai jingmut da ka NEP 2020.
Shuh shuh u Dr. Rani u la bynrap, “Ka jingwanrah ïa ka jingpule ‘Degree’ kaba 3 bad 4 snem ka lah ban wanrah ïa ka jingpynbeit kyrdan ha ka pule-puthi. Lada ki nongthung kam ki sngew mon da kito kiba la pyndep ïa ka jingpule ‘Degree’ kaba 4 snem, ka lah ban long ka jingduhnong ïa kito kiba pule ïa ka ‘Degree’ kaba 3 snem. Da kaba kheiñ lang kumjuh ïa baroh 2 tylli ki ‘Degree’, ka lah ban pynhiar ïa ka jinglong kongsan ka snem ba tam jong ka jingpule ‘Degree’ kaba 4 snem da kaba wanrah ka jingkulmar jingmut bad ka jingbym tikna.”
