Khliehriat, Nailar 08:
Ki spah ngut paidbah nongshong shnong ka Elaka Narpuh hapoh ka jingïalam ka Khasi Students’ Union (KSU) Narpuh Circle bad ki Waheh Shnong Narpuh Elaka ki la pynlong ïa ka jingïakhih ban pynpaw ka jingpyrshah ïa ka jingpulom jong ka National Highway Authority of India (NHAI) bad ka sorkar jylla ban sngap ïa ka jingdawa ban maramot ïa ka surok National Highway-06 kaba la jot rathai naduh na Mynkre haduh Malidor, East Jaiñtia Hills District.
Kane ka jingïakhih ka la sdang naduh jaka lum khajna ka NHAI kaba don ha Lumshnong naduh ka por 10 baje mynstep da kaba khang ïa ka leit ka wan ki kali kumjuh ka Toll Gate haduh ka por 4 baje janmiet, kaba long haduh 6 kynta ha ka sngi Ba-ar.
U President ka KSU Narpuh Circle, u KS Suchiang, u la ong kaba pynlong ïa ka KSU bad Waheh Shnong Elaka Narpuh ban shim ïa kane ka sienjam, ka long namar ba la kut ka jingai por ïa ka sorkar bad NHAI ban maramot ïa ka surokbah NH6 kaba la sniew bad jot rathai.
Ka surok bah NH-6 ka dei kawei na ki surok ba kongsan kaba pynïasoh ïa ka Meghalaya bad kiwei pat ki jylla jong ka thaiñ shatei lam-mihngi kaba kynthup ïa ka jylla Mizoram, Tripura, Barak Valley ka Assam bad ki bynta ba shatei jong ka Manipur.
Ki bor pynïaid District kynthup u Additional DC u Bah G Warjri ryngkat u DSP B Batacharrji bad ki katto katne ki pulit ki la wan ban ïakren bad ki dkhot ka KSU. Katba na ka liang ka NHAI la wan mihkhmat da u Manager Technical u Biswa Jyoti Lahkar uba la kular ïa ka KSU bad waheh shnong kumjuh ki paidbah nongshong shnong ban sdang noh ïa ka jingmaramot ïa kane ka surok naduh lashai ka sngi Balang.
Shuh shuh u President ka KSU Narpuh Circle u KS Suchiang u la ong ba la rai ba kin pynsangeh treikam ka Tollgate katba ym pat pynshna ïa ka surok haduh kumba 60 ne 70 percent.
Nalorkata, u la ong ba lada ka sorkar bad ki bor District kim lah ban leh eiei hapoh kane ka taïew katkum ka jingpan por ka jong ki, na ka liang ka KSU bad ki Waheh shnong kin shim da kawei ka rai kaba kham tyngeh.
