Shillong, Nailar 08:
Ki dkhot jong ka Hynñiewtrep Youths’ Council (HYC) hapoh ka jingïalam jong u Bah Robert June Kharjahrin ha ka Sngi Ba-ar ki la leit ban ïakynduh bad aiti da ka jingthoh ha u Myntri ka tnad pule-dangle ka jylla, u Rakkam A Sangma ha kaba ïadei bad ki katto katne tylli ki mat jingdawa kiba ïadei bad ka jingkyntiew ïa ka pule ka puthi hapoh ka jylla.
Haba kren sha ki lad pathai khubor hadien ba la dep ban ïakynduh ïa u Myntri, u President ka HYC Sengkmie, u Bah Robert June Kharjahrin, u la ong ba ki mat kiba kongsan eh ba ka seng ka la buh ki kynthup ïa ka jingdawa ban buh noh ïa ka skulbah lajong hapoh Shillong. Na ka liang u Myntri u la ong ba katei ka kam ka dang don hapdeng ka jingthmu ban ïakren bad u Myntri Rangbah ka jylla, u Conrad K Sangma bad ka kynhun Myntri jong u.
U Bah Robert u la ong ka bynta ba ar kaba ka seng ka la dawa na u Myntri ka long ban pyntreikam noh ïa ka skulbah Captain Williamson University, bad ha kajuh ka por ka seng ka la dawa ban buh noh ïa ka Regional Office jong katei ka skulbah hapoh ka thaiñ Khasi-Jaiñtia.
“U la ong ba ka jingpynkhreh ban thung ïa u Vice Chancellor bad ïa ki Pro Vice Chancellor ka la ïaid shakhmat bad u la ai ka jingpyntikna ba ha ka snem ban wan, kin sa pyntreikam noh ïa kane ka skulbah bad ka Shillong ruh kan sa don ïa la ka jong ka ophis treikam ha kaba ïadei bad kane ka skulbah”, la ong u Bah Kharjahrin.
Ka seng ka la rah ruh ïa ka mat ban ïakren bad utei u Myntri ha kaba ïadei bad ka jingrem eh ka bai skul ne ki bai pule. Ka seng ka la dawa ruh ba la donkam ban pynïaid noh ïa ka bai skul da ka sorkar khamtam ha ki skul ba ïoh jingïarap na ka sorkar bad ha ki skul jong ki riewshimet namar kane ka la ktah shikat dei ïa ki khynnah pule bad ïa ki kmie ki kpa. Na ka liang u Myntri u la ong ba un sa shim khia halor kane.
“Kane ka ktah haduh katta-katta ïa ki longïing longsem bad ka jingkiew than ka dor ka dei kawei na ka jingkiew jong kiba pep skul shiteng por”, la kubur u Bah Kharjahrin.
Shuh shuh ka seng ka la dawa ruh na utei u Myntri ha kaba ïadei ban ai jingïarap ïa ki kolej bapher bapher, ban buh ïa ki ‘Centre’ thoh eksamin CUET hapoh ka jylla. Na ka liang u Myntri u la ong ba ha u snem ban wan, ka jylla kan sa ïoh saw tylli ki ‘Centre’ ha kaba ar tylli kin don ha Shillong, kawei ha Jowai katba kawei pat ha Tura.
Nalor kata, ka seng ka la dawa ruh ban wanrah ïa ka sobjek Aptitude bad ka Logical Reasoning ha ki skul khnang ba ki khynnah pule kin long kiba la pynkhreh ha ki eksamin bapher bapher. Na ka liang ka seng kan sa ai jingmut ruh ïa kane sha ka Education Commission bad ka mat kaba khadduh ba ka seng ka la rah ha utei u Myntri ka long ba ka sorkar ka dei ban shim khia halor ka jingshah ktah jong ki 200 ngut tam ki samla pule napoh ka jylla Meghalaya ha ka jingjia ha Manipur.
