Nongstoiñ, Nailar 08:
Kawei ka trok kaba kit ïa ki mar bam hapoh ka Integrated Child Development Services (ICDS) ka la kylla bad hap jraiñ sha lyngkha kba kaba don mar syndah bad ka surok na ka daw ka jingsniew palat jong ka surok.
Kane ka jingjia ka la jia ha ka 7 tarik mynta u bnai, hapdeng ka bynta jong ka surok na Mawsainwir sha Mawkynrang kaba hap hapoh ka Mawthadraishan constituency.
Kane ka trok kaba la kylla ka dei kaba don ïa u registration number ML06-A-0373, bad ki mar bam kiba ka la kit ruh, ki la hap lang sha lyngkha kba, ha kaba la hap ban leit rah bad kit biang ban thep pat ha kawei pat ka kali.
Ka jingsniew jong kane ka surok kam dei kaba dang thymmai, hynrei na ka liang jong ki nongshong shnong ki la ïathuh ba kane ka surok, ka dei kaba la wanrah jingeh shi katdei ha ka leit ka wan khamtam lei lei ha ka aïom hap slap, ha kaba ym ithuh shuh ïa ki thliew ki syar, kaba la i thik kum ka pung dohkha.
Wat la ka bynta jong kane surok ka dei kaba pynïasoh bad san tylli kiwei pat ki shnong, hynrei wat la ka don ka jingud jingnam, ym don ba patiaw ne sngap bad khamtam lei na ka liang ki bor ba dei khmih ban pynbha ne maramot.
Ym tang ki kali heh, hynrei wat ki kali rit ruh ki la shem jynjar bha ban ïaid lyngba kane ka surok naba ki ju mad jingeh jan man la ka por khamtam lei ha ka aïom hap slap. Kane ka surok ka dap sa tang da ka ktieh bad dap sa tang ki pung dohkha ne ki pung jngi hapdeng surok ha kaba ki nongñiah kali ruh ki shem shitom ban kiar ïa kine ki pung.
