Shillong, Nailar 08:
Ka pule puthi ki samla na Meghalaya kiba pule ha Manipur ka la thut bha bad ka lah ban ktah ïa ka por bad ka jingpynlut kaba ki kmie ki kpa ki la mang na ka bynta jong ki lada ym lah pynjem ïa ka jingumsnam kaba la neh mynta la palat lai bnai naduh ka 3 tarik Jymmang mynta u snem.
Ki don palat 200 ngut na Meghalaya kiba pule ha Manipur kata naduh kiba pule doktor (MBBS bad Post Graduate) nalor kiba pule ha Central Agriculture University (CAU) Imphal.
Tang kiba pule ha Regional Institute of Medical Sciences (RIMS) kaba don ha Lamphelpat ha nongbah Imphal ha Manipur ki don kumba 168 ngut bad kiba pule ha CAU Imphal ki don kumba 46 ngut. Ki don ruh kiba dang hap leit pule thymmai ha CAU tangba kim pat leit mynta.
Haba pyrshang ban wad jingtip na ka Sorkar Jylla, kaei ka lad ba kan shim lada kine ki samla kim lah ban leit phai sha Manipur ban bteng ïa ka jingpule jong ki, ka jubab ka long ba ka jingïakren ka dang ïaid bad ki bor ba dei khmih namar ka don ka jingkular ba yn shim ïa ki lad ki lynti ban pyntikna ba ki jaka pule kim dei ban thut.
Hadien ba la mih ka huri-hura ha Manipur, bun ki samla pule kiba dei na Meghalaya ki la wanphai noh na Manipur ha kaba ka Sorkar Jylla ka la ïarap ïa ki kumno ban wanphai sha la ka jong ka Jylla.
“Ngi dang peit thuh bad ap ruh ïa ka jinglong jingman ba kan bha hangthie ha Manipur khnang ba kan nym long ka jingduh ïa ki samla ka Jylla kiba la leit rung ban pule ha ki jaka pule kiba don ha Manipur khamtam kiba pule doktor bad kiwei kiwei ki tnat pule,” la ong ka tyllong khubor.
Ka jingumsnam ka la sdang ha Manipur naduh ka 3 tarik Jymmang ha kaba ka jingkynad ka la mih hapdeng ki ar jaitbynriew kata ki Meitei bad Kuki bad la sakhi ïa ka jingpynjulor kaba jur bad jingpynïap briew kaba shyrkhei haduh katta-katta.
Kat haduh mynta ka jinglong jingman ha Manipur ka dang sniew bad ym pat don jingshngaiñ satia namar ka jingthang ïa ki ïing ki sem ka dang bteng haduh kine ki sngi.
