Shillong, Nailar 08:
U nongaibuit ka seng United Democratic Party (UDP), Bah Bindo M Lanong uba dei ruh u MDC ba shu sieh jong ka sorkar jylla ha KHADC, u la pynpaw ba um don jingtip eiei ïa kata ka General Council jong ka seng UDP ka ban long ha ka 12 tarik mynta u bnai.
U Bah Bindo u la pynpaw ka jingkyndit ban ïohsngew ïa kata ka khubor ba ka UDP kan pynlong noh ïa ka General Council ban pynthymmai ïa ki nongkitkam ka UDP namar haduh mynta ym don ba pyntip.
“Naduh ba nga la leit pynkhreh ban ïakhun ïa ka ilekshon MLA na Nongkrem constituency, ki nongïalam ka UDP ki la sdang ban leh kiar ïa nga namar kim shym la pyntip shuh ïa nga lada don kino-kino ki kam kiba kongsan jong ka seng” u la ong.
U Bah Bindo u la ïathuh ba haduh mynta u dang dei u nongaibuit jong ka seng UDP, hynrei un nym leit sha kane ka jingïalang ka UDP ka ban long la Sngi Saitjaiñ ha shlem treikam ka UDP ha Shillong namar um ïoh jingtip.
“Lada jia ba ki weng noh ïa nga kum u nongaibuit jong ka seng UDP, ngam sngeweiei namar ki khlem pyntip shuh ïa nga” u la ong.
Nangta, u la pynpaw ruh ba ka jingpynkhreh jong u ban leit sha Nongkrem constituency ka dei namar bym pat don kyrtong, hynrei ba u la dep ïaid ki sa leit khot ïa u Bah Lambor Malngiang.
Nalor kata, u la ong ruh ba lada ki ai tiket ïa u briew uba dei u nongtrei ka seng UDP u lah ban kynran dien noh wat la hadien ba u la dep pynkhreh, hynrei un kynran dien kumno haba ki ai tiket ïa u briew u bym dei na ka seng UDP.
“Lada ki pynskhem biang ïa kijuh ki nongkitkam ne ki lah ban weng lut ïa ki nongkitkam ngam kwah ban ong eiei” u la ong.
Ha kane ka General Council jong ka UDP kan sa mynjur ïa ki nongkitkam bathymmai ba la tyrwa da ka Nomination Committee ka ban sa shong jingïalang shwa ha ka por mynstep ha ka 12 tarik mynta u bnai.
