Shillong, Nailar 08:
U Myntri Rangbah ka Jylla, u Conrad K. Sangma ha ka Lah Sngi U Blei u la aiti ïa ka shithi sha u Myntri ka tnad ka rep ka riang ka Sorkar Pdeng uba long ruh u President ka ICAR Society, u Narendra Singh Tomar ban kyrpad ïa ka jingtuklar jong u bad ban pynsngew sha ki bor pynïaid ka skulbah ban pynbit pynbiang shipor ïa ki jingdonkam na bynta ki samla pule ka Jylla kiba dang bteng ïa ka jingpule jong ki ha ka snem ba 4 ha ka BSc. Agriculture ha CAU, Imphal.
U Myntri Rangbah u la ïakynduh bad aiti ïa ka shithi sha u Tomar ha ka Lah Sngi U Blei ha New Delhi.
Ha ka shithi, u Myntri Rangbah u la kyrpad ïa u Tomar ban pynbiang ïa ki jingdonkam khnang ba ki samla pule ka BSc (4th Year) ki lah ban ïaid shakhmat bad ka Rural Agriculture Work Experience (RAWE) Programme ha Meghalaya.
U la kyrpad ban shah ïa ki samla pule ban ïaid shakhmat bad ka prokram RAWE hapoh ka jingkyrshan ka CAU, Kyrdemkulai, kaba syrïem bad ka College ka CAU, Imphal.
U Sangma u la kyrpad ruh ïa u Myntri ban pynkynriah noh ïa baroh ki samla pule ka Jylla kiba na CAU Imphal sha CAU, Kyrdemkulai tat haduh ba ka suk ka saiñ kan wanphai ha Manipur khnang ba ki lah ban bteng ïa ka jingpule jong ki khlem kano-kano ka jingthut.
U Myntri Rangbah u la pynpaw ruh ka jingsngewnguh ïa u Tomar halor ki kam ba la pyntyllun da ka tnad.
Shuh shuh u la kdew kumno ka Sorkar Jylla ha ryngkat ka jingïatreilang bad ka Sorkar India ka la ïarap na bynta ban pynpoi suk ïa ki nong Meghalaya na Manipur ha kine ki por ba la dep namar ka jingïakynad ha katei ka Jylla.
