Jowai, Nailar 08:
Ka jingdawa ka long kaba la slem bha kaba ka la urlong pat mynta ka kynti haba u Myntri ka tnat Civil Defence & Home Guards, u Bah Comingone Ymbon u la wan ban kyntiew kyrdan ïa ka Raliang Police Outpost sha ka Police Station ha ka jingïalang kaba la long ha ka Sngi Ba-ar.
Ha kane ka jingïalang plie ïa kane ka thanat ha Raliang la ïadonlang u Superintendent of Police ka West Jaiñtia Hills District, Bah Chemphang Syrti bad kiwei kiwei ki ophisar pulit ha ryngkat ki nongïalam shnong bad ki ‘riew rangbah jong ka thaiñ.
U Bah Comingone uba long ruh u MLA ka Raliang, haba kren kum u kongsan u la pynpaw ba u la shimkhia shibun ban kyntu ïa ka sorkar na ka bynta ban kyntiew kyrdan noh ïa kane ka Out Post (OP), bad u la ong ruh ba kane ka jingkyntiew kyrdan kam dei satia namar ka jingkiew jong ki kam pyntriem hapoh ka thaiñ, hynrei ka dei ka sienjam ban pynïajan ïa kane ka tnat treikam bad ki paidbah nongshong shnong.
Nangta, u la ong ruh kane ka sngi kan dei ka sngi sah kynmaw ha kaba ki nongshong shnong kim donkam shuh ban leit shaduh sha Jowai na ka bynta kino-kino ki kam kiba ïadei bad ki thanat.
Nalorkata, u la kdew ruh ba namar ka jaka ba la buh ïa kane ka thanat ka long kaba rit bad khapngiah, kumta u buh ka jingkyrpad ïa ka dorbar shnong ba kan tuklar lem khnang ban pynïoh ïa ka jaka kaba kham heh na ka bynta kane ka thanat.
Kum ban shu pynkynmaw ha ka 3 tarik Naiwieng, 2022, ka sorkar MDA hapoh ka jingïalam u Conrad K Sangma kum u Myntri Rangbah ka Jylla u la dep ruh ban buh ïa u mawnongrim na ka bynta ka Fire & Emergency Service Station, Raliang.
