Jowai, Nailar:
Ka shlem treikam District Handloom Officer, West Jaiñtia Hills District kaba hap hapoh ka Department of Textile, Directorate of Sericulture and Weaving ka sorkar jylla ha ka 7 tarik ka la pynïasoh lang ha ka jingrakhe ïa ka “National Handloom Day” ha ka prokram kaba la long ha Mukhap CFC cum Production Centre, WJH.
Ha kane ka prokram la wan ïadon lang u MLA ka thaiñ Bah Nujorki Sungoh kum u kongsan bad u Deputy Commissioner Bah B S Sohliya kum u symbud kongsan.
Haba kren ha ka jingïalang u MLA u la ong, “Wat la ngi ai ka jingïaroh ïa ka kolshor jong ki ri sepngi bad bud ruh halor kiba bun ki bynta na kiwei pat ki ri kiba lam sha ka jingkiew shaphrang, hynrei ha kajuh ka por ngim dei ban klet noh ïa la ka jong ka tynrai kaba pynwandur bad pynithuh ïa ka tynrai bad ki jingdon jingsap ki jong ngi.”
“Ka jingshisha ka long ruh ba ka jingpule bniah na kiwei pat bad lehkmen ïa la ka tynrai kaba ngi hiar pateng kan long ka nuksa ba bha ban kiew shaphrang,” la ong u Bah Nujorki.
Nalor kata, u MLA u la kdew ruh ba na ka liang ka sorkar Meghalaya ka la pyntreikam ïa ki kpait saiñ kam (policy) bapher bapher bad plie ruh ïa ki lad ki lynti bapher bapher na ka bynta ban kyntiew bad pynneh pynsah ïa ka kolshor tynrai ka jylla. Kane ka jingpynneh pynsah kum kine ki kam shna kti bad thaiñ jingthaiñ hapoh ka district kan plie lad plie lynti ha ka liang ka ïoh kam ïoh jam na ka bynta kiba bun ki samla.
Ha kane ka jingïalang la ïoh ruh ka jingkren na ka Deputy Director (Weaving) Kong M. R Leewait kaba la pynpaw halor ka jingthmu ba kongsan jong kane ka sngi, da kaba pyntip ruh ba ïa ka National Handloom la rakhe man ka snem ha ka 7 tarik u Nailar ban kynmaw burom ïa kiba kum kine ki nongshong shnong.
Kiwei pat kiba la ai jingkren ki kynthup ïa u Deputy Commissioner Bah BS Sohliya, BDO Laskeiñ C&RD Block Bah BS Niang, MDC ka thaiñ Bah WG Sungoh nalor kiwei pat.
