Shillong, Nailar 08:
Ka jingïalang jong ki Regional Committee ka Meghalaya bad Assam kaba la long ha ka sngi Ba-ar ha Amingaon, Kamrup, Assam ka la shim ïa ka rai ba kan sa hiar ban jurip sha ka Langpih Sector kata hadien ka jingrakhe ïa ka Sngi Laitluid ka Ri ne ka Independence Day.
Ïa kane la pyntip da u Chairman ka Regional Committee jong ka West Khasi Hills, Bah Paul Lyngdoh uba long ruh u Myntri ka Sorkar Jylla, hadien ba la wai ka jingïalang ki Regional Committee, ha kaba na ka Regional Committee ka Kamrup District la mihkhmat da u Chandra Mohan Patowary uba long ruh u Myntri ka Sorkar Assam.
U Bah Paul u la ong ba ka jingthmu hi jong ka jingïakren ha katei ka jingïalang ka long ban pynbeit ïa ki jingeh kiba mih na baroh ar Jylla bad ban wad ïa ki lynti ban ïapynbeit da ka jingïasngewthuh jingmut halor ka jingïakajia pud khamtam ha Langpih Sector, kaba dei kawei na ki jaka ba jur bha ka jingïakynad.
Shuh shuh u la pyntip ba ki ar tylli ki committee ki la rai ban leit jurip lang ïa ka thaiñ Langpih hadien ka jingrakhe ïa ka Sngi Laitluid jong ka Ri bad ban ïakren bad ki kynhun bapher bapher nalor ki nongshong shnong, ki nongïalam shnong bad ki Khlieh Nongsynshar.
U Bah Paul u la ong, “Ka jingïakren ha kane ka sngi ka long kaba seisoh bha bad ka don ka mynsiem ban ïaburom markylliang, ha kaba ka Sorkar Assam ka kwah ïa ngi ba ngin ai jingtip ïa ki jaka ki bym don jingïakajia ha kaba ki nongshong shnong jong kine ki jaka ki kwah ban neh bad ka Meghalaya nalor ki Voter ID ba la register ha Meghalaya bad ki kam pynroi ba la pyntrei da ka Sorkar Meghalaya ha kine ki phew phew snem bala leit noh.”
Ha kawei pat ka liang, u Chairman ka Regional Committee ka West Khasi Hills u la ong ba ka don ka jingkyrmen ba kine ki jaka ki lah ban pynphai pat sha ka Jylla Meghalaya. U la ong ba da ka jingïatreilang bad ka Sorkar Assam, ka lynti ka don ha ka ban lah pynbeit noh kham kloi ïa kane ka jingïakajia kaba la sahteng la slem.
Ha kajuh ka por u Bah Paul u la pyntip ruh ba kine ki Regional Committee jong baroh ar tylli ki Jylla ki la mynjur ba ki don ki jaka kiba don hapdeng ka jingeh ban ïa pynbeit.
“Katto-katne ki jaka ki dei kiba la ithuh kum ki jaka kiba don jingeh bha hynrei ngin wad ïa ka lynti kaba pdiang bad mynjur lang, ïa kaba ngin sa ïakynduh biang hadien ka 15 tarik Nailar ha Shillong,” la ong u Bah Paul.
