Shillong, Nailar 08:
U nongïalam ka seng Congress, u Rahul Gandhi, un sdang biang ïa ka jingïaid kjat ha ka wat kaba ar lane kata ka Bharat Jodo Yatra na Gujarat ha Sepngi sha Meghalaya ha Mihngi.
Ïa kane, la ïathuh da u President ka seng Congress ha Maharashtra, u Nana Patole, haba kren sha ki lad pathai khubor ha ka Sngi Ba-Ar.
Kane ka Bharat Jodo Yatra ka dei ka jingkwah jong u Rahul ban wanrah ïa ka jingïatylli hapoh ka Ri kaba u sngew ba ka la shong synjor naduh ba synshar ka sorkar BJP. Ka jingkynnoh jong u Rahul ka long ba ka sorkar BJP ka la pynïapait ïa ki nongshong shnong lyngba ka rukom synshar ka jong ka, bad namarkata, u sngewdonkam ban wanrah biang ïa ka jingïaieid bad jingïajan hapdeng ki para nongshong shnong.
“Ka wat kaba ar jong ka jingïaid kjat lane ka Bharat Jodo Yatra u Rahul Gandhi kan sdang na ka jylla Gujarat bad kan kut ha jylla Meghalaya,” la ong u Patole.
Ha kajuh ka por, u Patole u la ong ba kiwei pat ki nongïalam ka seng Congress kin ïalam ïa kane ka jingïaid kjat ha ki bynta bapher-bapher ha Maharashtra.
Ha ka wat banyngkong jong ka Bharat Jodo Yatra, u Rahul u la ïaid jan 4,000 km na Kanyakumari ha Tamil Nadu sha Kashmir.
Kane ka wat banyngkong ka la sdang ha ka 7 tarik Nailur, 2022, ha Kanyakumari, bad ka la kut ha ka 30 tarik Kyllalyngkot, 2023 ha Srinagar. Ka jingïaid ha kane ka wat banyngkong ka la long haduh 3,970 km lyngba 12 tylli ki jylla bad ar tylli ki Union Territory, bad ka la neh palat 130 sngi.
Hynrei na ka bynta ka wat ba ar, ka seng Congress kam pat lah ban pynthikna ïa ki tarik bad kumjuh ruh ïa ka lynti ïaid jong u Rahul Gandhi.
