Shillong, Nailar 09:
Namar ka jingmad jingeh bad jingduh ki samla ka Jylla kiba leit pule doktor bad shaphang ka rep ka riang ha ki jaka pule ka Sorkar Pdeng kiba don Manipur, ka Sorkar Jylla ka la buh ka jingtyrwa ban ailad noh la kumno kumno kumba shisnem ba kin ïoh bteng ïa ka jingpule ha Shillong kum ka jingpynbeit kaba shipor la ka dei ïa kiba pule ha Regional Institute of Medical Sciences (RIMS) ne Central Agriculture University (CAU) kiba don Imphal.
Ïa kane la ïathuh da u Myntri Rangbah ka Jylla, u Conrad K Sangma haba pynpaw ka jingsngewkhia halor ka jingduh ki samla ka Jylla ïa ka jingpule ha kine ki bnai namar ka jingumsnam kaba la bteng ha Manipur naduh u Jymmang haduh mynta.
U Conrad u la ïathuh ba ïa kane ka jingtyrwa la dep ban pynsngew ha ki Myntri ka Sorkar Pdeng ha New Delhi ha ka por ba ïakynduh ïa ki, kita, u Myntri ka tnat ka koit ka khiah bad u Myntri ka tnat rep ka Sorkar Pdeng.
“Ngi la buh kane ka jingtyrwa sha baroh ar ngut ki Myntri ka Sorkar Pdeng da kaba ai jingmut ba ki samla pule kiba pule ha RIMS bad CAU ha Imphal, lada lah ban ai ïa ki ka por kumba shisnem ba kin pule la ka dei ha Shillong lane ha kano-kano ka bynta jong ka thaiñ shatei lam mihngi kaba kham jan bad ha Umïam campus jong ka CAU, khnang ba ki samla pule ki lah ban wan na ka bynta shisnem ban pule,” la ong u Conrad.
U la ïathuh ba kane ka jingtyrwa ka Sorkar Jylla ka la ïoh ïa ka jingïahap jingmut na kine ki Myntri ka Sorkar Pdeng tangba ïa ka rai ym pat shim namar lada dei ban shim rai, hap ban shim na ka liang u Myntri ka tnat korbar ri lem bad kiwei ki Myntri tangba kine ki Myntri baroh ar ngut ki la ong lypa hooid bad kubur ba ka dei ka jingtyrwa bad jingai jingmut kaba ïahap bad yn sa khmih bniah shuh shuh ïa kane.
Kum ban shu kdew, ki don palat 200 ngut na Meghalaya kiba pule ha Manipur kata naduh kiba pule doktor (MBBS bad Post Graduate) nalor kiba pule ha Central Agriculture University (CAU) Imphal.
Hadien ba la mih ka huri-hura ha Manipur, bun ki samla pule kiba dei na Meghalaya ki la wanphai noh na Manipur ha kaba ka Sorkar Jylla ka la ïarap ïa ki kumno ban wanphai sha la kajong ka Jylla.
Ka jingumsnam ka la sdang ha Manipur naduh ka 3 tarik Jymmang ha kaba ka jingïakynad ka la mih hapdeng ki Meitei bad Kuki bad la sakhi ïa ka jingpynjulor kaba jur bad jingpynïap briew kaba shyrkhei haduh katta katta.
Haduh mynta, ka jinglong jingman ha Manipur ka dang sniew bad ym pat don jingshngaiñ satia namar ka jingthang ïa ki ïing ki sem ka dang bteng haduh kine ki sngi. Ka jingbym pat wanphai ka suk ka saiñ ha Manipur ka la ktah lut ïa ka jingtreikam kynthup ïa ki jaka pule naduh ki kolej, skulbah bad ki jaka pule kiba peit da ka Sorkar Pdeng.
