Shillong, Nailar:
Ka Hynñiewtrep Youths’ Council (HYC) Ri Bhoi Sepngi Circle ha ryngkat bad ki nongïalam jong ka HYC sengkmie ha ka Sngi Ba-ar ka la leit ban ïakynduh bad ai da ka shithi ha u Myntri ka tnad pule puthi ka jylla, u Rakkam A Sangma halor ka jingdawa ba dei ban pyntreikam noh ïa ka Patharkhmah Model Degree College kaba don hapoh katei ka thaiñ.
Haba kren sha ki lad pathai khubor hadien ka jingwan ïakynduh ïa u Myntri ka tnad pule-dangle, u President ka HYC Ri Bhoi Sepngi Circle, u Bah R C Thangkhiew u la ong ba haduh mynta na ka liang jong ka sorkar kam pat shym la plie ïa ka Patharkhmah Model Degree College kaba don hapoh ka shnong Patharkhmah ha Jirang Block wat haba ïa ki jingtei jong katei ka kolej la pyndep lut. Kumta na ka liang ka seng ka la kyrpad ïa ka sorkar ba kan plie noh ïa katei ka jaka pule khnang ba kan long ka jingmyntoi ïa ki paidbah kiba dei na katei ka thaiñ bad khamtam eh ïa ki samla kiba wan na ki longïing longsem kiba duna ha ka ïoh ka kot.
“Ha kane ka sngi, ngi la wan ban ïakynduh ïa u Myntri ka tnad pule puthi ban ïakren bad u halor ka jingbym plie noh jong ka sorkar ïa kane ka kolej wat haba ïa kane ka mala, ki kamra bad baroh ki jingtrei la dep lut”, la ong u Bah Thangkhiew.
Na ka liang u Myntri u la ai ka jingkular hakhmat ka seng ba ha u snem 2024 yn sdang ban plie noh ïa katei ka jaka pule.
Ha kajuh ka por, ka seng ka la ong ruh ba lada ka sorkar kan plie paidbah noh ïa katei ka kolej, ka dei ban pynbiang ruh ha kaba ïadei bad ka surok, ka bording bad ka umbam hapoh katei ka kolej.
“Namar lada kine lai tylli kim biang, ka mut ka don jingeh ïa ki khun samla kiba pule ha katei ka kolej lane ïa ki nonghikai lane kiba trei hapoh kato ka jaka”, la ong u Bah Thangkhiew.
Ha kaba ïadei bad kane ka bynta, na ka liang utei u Myntri u la ong ba un sa shimkhia halor kane bad un sa ïakren ïa kane ha ka jingïalang ka ban sa long bad u Myntri Rangbah ka jylla, u Conrad K Sangma.
“Lada ka sorkar kam leh eiei kumba ka la kular hakhmat jong ngi kum ki nongïalam jong ka seng ba ha u snem ban wan kane ka kolej kam plie, na ka liang jong ngi, ngin sa buddien halor jong kane ka bynta”, la kubur u Bah Thangkhiew.
